Պաշտպանության նախարարին Հասարակական խորհուրդը հետամուտ է եղել զինծառայողների սոցիալ-իրավական երաշխիքների լիարժեք ապահովման խնդիրների իրագործմանը։ Հոկտեմբերի 28-ին ամփոփվել են ՀՀ պաշտպանության նախարարին առընթեր հասարակական խորհրդի՝ վերջին երեք տարիներին ծավալած գործունեության արդյունքները:

Հասարակական խորհրդի անդամների հետ ՀՀ պաշտպանության նախարարի հանդիպման ընթացքում հնչել են առաջարկություններ, մատնանշվել են առաջիկա աշխատանքային ուղղությունները:

Սեյրան Օհանյանը հասարակական կարծիքի եւ զինված ուժերում խնդրահարույց հարցերի ուսումնասիրման, հասարակության շրջանում բանակի դերակատարության բարձրացման առումով կարեւորել է Հասարակական խորհրդի ծավալած գործունեությունը: Պաշտպանության նախարարը վստահություն է հայտնել, որ խորհուրդն իր արդյունավետ գործունեությամբ այսուհետ եւս բանակի եւ հասարակության միջեւ կձեւավորի երկխոսության մթնոլորտ:

Ներկայացնելով վերջին երեք տարիների ընթացքում իրականացված միջոցառումներն ու հիմնական ձեռքբերումները, ՀՀ պաշտպանության նախարարին առընթեր հասարակական խորհրդի նախագահ, նախարարի խորհրդական Գեղամ Հարությունյանը նշել է, որ հաշվետու ժամանակահատվածում Հասարակական խորհուրդը հետամուտ է եղել զինծառայողների սոցիալ-իրավական երաշխիքների լիարժեք ապահովման, բանակի կանոնադրական հիմքերի ամրապնդման, զորակոչի գործընթացում արդարության եւ օրինականության սկզբունքների արմատավորման, ինչպես նաեւ հանրային ընկալման մեջ բանակի ճշմարտացի արտացոլման խնդիրների իրագործմանը: Անդրադարձ է կատարվել Հասարակական խորհրդի հովանու ներքո գործող քաղաքացիների դիմումների եւ բողոքների քննարկման հանձնաժողովի աշխատանքներին: Ընդգծվել է, որ գործելով հիմնականում զորակոչիկների առողջական խնդիներին վերաբերող հարցերի դաշտում, հանձնաժողովը զորակոչ առ զորակոչ ավելի մեծ վստահություն է ձեռք բերում հանրության շրջանում:

Ամփոփելով կատարված աշխատանքները՝ Հասարակական խորհրդի նախագահը հավաստիացրել է նաեւ, որ առաջիկայում եւս իրենց գործունեությունը միտված է լինելու բանակ-հասարակություն կապերի առավել սերտացմանը, հայրենիքի պաշտպանի ազգային-գաղափարական դաստիարակությանն ուղղված տարաբնույթ միջոցառումների կազմակերպմանը եւ, իհարկե, նկատված խնդիրների բարձրաձայնմանը:

Հանդիպման ավարտին պաշտպանության նախարարին առընթեր հասարակական խորհրդի նախագահը եւ անդամները հանդես են եկել մի շարք առաջարկություններով, քննարկվել են առաջիկա աշխատանքային ծրագրերը, որոնց վերաբերյալ պաշտպանության նախարար Սեյրան Օհանյանը ներկայացրել է իր դիտարկումները եւ տվել համապատասխան ցուցումներ: