Գերմանիայի խոշորագույն Lufthansa ավիաընկերությունը բորտուղեկցորդների գործադուլի պատճառով չեղյալ է համարել 929 նախանշված չվերթ։  Այդ մասին տեղեկացրել է ավիակոնցեռնի ներկայացուցիչը։ 

Գործադուլը տեղի է ունենում Մայնի Ֆրանկֆուրտի, Մյուխենի եւ Դյուսելդորֆի օդանավակայաններում։  Գործադուլը Ֆրանկֆուրտում եւ Դյուսերլդորֆում կտեւի մինչեւ տեղի ժամանակով  23:00-ը, իսկ Մյուխենում՝ մինչեւ կեսգիշեր։  Սպասվում է, որ մոտ   113 հազար ուղեւոր ստիպված կլինի վերանայել իր պլանները, տեղեկացնում է ՏԱՍՍ-ը։  

Բորտուղեկցորդների անկախ կազմակերպություն արհմիությունը գործի մեջ փորձարկում է իր նոր մարտավարությունը.  Նա նախապես չի տեղեկացնում բողոքի ակցիայի անցկացման ժամանակի եւ ընդգրկման մասին, որպեսզի   Lufthansa-ն դրան պատրաստվելու հնարավորություն չունենա։  Lufthansa-ի դուստր ձեռնարկությունների բորտուղեկցորդները գործադուլին չեն մասնակցում։   

Արհմիությունը գործադուլի մասին հայտարարել է անցած հինգշաբթի օրը՝ այն բանից հետո, երբ կողմերը չկարողացան համաձայնության գալ սակագնային բանակցությունների հերթական փուլի ընթացքում։ Գործադուլը, հնարավոր է՝ ընդմիջումներով, երկրի տարբեր օդանավակայաններում կընթանա մինչեւ նոյեմբերի  13-ը։ Ի թիվս այլ հարցերի, վեճի առարկա է բորտուղեկցորդների թոշակի հարցը, որի շուրջ անհամաձայնությունը արհմիության եւ  Lufthansa-ի միջեւ շարունակվում է արդեն մոտ երկու տարի։