նախընտրելի դարձնել
Հայաստանի զարգացման հիմնադրամի աջակցությամբ կոշիկ արտադրող հայրենական ութ ընկերություններ մարտի 15-18-ը մեկ միասնական տաղավարով ոլորտը ներկայացնում են Մոսկվայում մեկնարկած «MosShoes’2016» միջազգային ցուցահանդեսին: Այն 67-րն է իր պատմության ընթացքում, անցկացվում է տարեկան չորս անգամ՝ հունվար, մարտ, հունիս եւ սեպտեմբեր ամիսներին։
Նախորդ՝ «MosShoes’2016» 66-րդ ցուցահանդեսի մասնակցության արդյունքում Հայաստանը ներկայացնող ընկերությունները շուրջ 15 000 զույգ կոշիկի արտահանման պայմանավորվածություններ են ձեռք բերել, մի շարք գործարքներ բանակցությունների փուլում են։ «Հայաստանի զարգացման հիմնադրամը հայկական ընկերությունների մասնակցությանն աջակցել է՝ հաշվի առնելով նախորդ ցուցահանդեսի դրական արդյունքները։
Հիմնադրամը հետեւողական քայլեր է անում արտահանման խթանման ուղղությամբ եւ, հույս ունենք, կնքված պայմանագրերը հետագայում կամպրապնդվեն ավելի երկարաժամկետ եւ ավելի մեծածավալ արտահանումների գործարքներով»,- նշել է Հայաստանի զարգացման հիմնադրամի գործադիր տնօրեն Արման Խաչատրյանը։
67-րդ «MosShoes»-ին մասնակցում են ավելի քան 500 առաջատար կոշիկ եւ կաշվե պարագաներ արտադրող նորաստեղծ ու համաշխարհային ճանաչում ունեցող ապրանքանիշեր ներկայացնող ընկերություններ: Հայաստանից բացի ցուցահանդեսին ներկայացված են արտադրողներ Ավստրիայից, Բելառուսից, Բրազիլիայից, Մեծ Բրիտանիայից, Գերմանիայից, Դանիայից, Իտալիայից, Հնդկաստանից, Չինաստանից, Իսպանիայից, ընդհանուր առմամբ՝ 30 երկրներից։ «MosShoes»-ը կոշիկի ու կաշվե պարագաների արտադրության Ռուսաստանի եւ Արեւելյան Եվրոպայի խոշորագույն ցուցահանդեսն է, որին տարեկան այցելում են շուրջ 12 հազար մարդ՝ հիմնականում ոլորտի մեծածախ գնորդներ եւ մասնագետներ։
Հայրենական կոշիկի արտադրության ոլորտն այս ցուցահանդեսին ներկայացնում են «Զեննի», «Էլեն 93» «Մաքսոլ», «Բաբիննի», «Բենիտո», «Սիմար» ընկերությունները, «Վահագն Ակուշյան», «Արտաշես Գասպարյան» ԱՁ-երը:
