19-ամյա զինծառայող Կամո Մարտիրոսյանը, որը նախնական վարկածով՝ մարտի 14-ին Տավուշի մարզի մարտական դիրքերից մեկում ինքնասպանություն է գործել, դեպքից երեք օր առաջ էր խոսել  ավագ եղբոր հետ, դժգոհել էր ծառայությունից: 

«Ասեց՝ լավ չի: Զանգեց, ասեց՝ մի քանի օր էլ չեմ զանգի, մամային կասես՝ թող պինդ մնա, քանի ես սաղ եմ, քանի ես ստեղ եմ, թող հանգիստ լինի»,- NEWS.am-ի հետ զրույցում ասաց մահացած զինծառայողի եղբայրը՝ Հայկը՝ նշելով, որ եղբայրը չի մանրամասնել, թե ինչից է դժգոհ:

Հայկը պատմեց, որ եղբայրը, որ մեկ տարի ու երեք ամիս է՝ ծառայության մեջ էր, նախկինում ոչնչից չի բողոքել, ոչ մեկի հետ խնդիր չի ունեցել: Եղբոր համար էլ անհասկանալի է՝ ինչու պետք է Կամոն  ինքնասպանություն գործեր:

«Ինքը կյանքում իրան տենց վնաս չէր տա: Ինչ-որ մի դրդապատճառ եղել է հաստատ: Ինքը ոչ ինչ-որ մեկի լավին ա խառնվել, ոչ վատին»,- ասաց  Հայկը:

Կամոն վերջին անգամ օգոստոսին էր արձակուրդ եկել:

Կամո Մարտիրոսյանը մահացել է մարտի 14-ին՝ ժամը 16:00-ի սահմաններում: Նա մահացել է  մարտական դիրքում, կզակի շրջանում ստացած մահացու հրազենային վիրավորումից:

Դեպքի առթիվ ՀՀ քրեական օրենսգրքի 110 հոդվածի 1-ին մասով /ինքնասպանության հասցնելը/ հարուցվել է քրեական գործ, կատարվում է նախաքննություն: