Արտակարգ իրավիճակների  նախարար Արմեն Երիցյանը պնդում է` վաղ թե շուտ պետք է ստեղծվի Ներքին գործերի նախարարություն:  Թե ինչու է շահագրգիռ նախկին փոխոստիկանապետ Արմեն Երիցյանն այս հարցում, եւ որքանով են իրականությանը համապատասխանում լուրերը, որ հենց ինքն է ձգտում այդ գերատեսչության ղեկավարի պաշտոնին, նա պարզաբանել է NEWS.am-ի հետ հարցազրույցում: 

Պարոն Երիցյան, արտակարգ իրավիճակների  եւ տարածքային կառավարման նախարարությունը կրկին առանձնացնելուց հետո, ինչպե՞ս եք Ձեզ զգում առանց «սուպերնախարարի» կարգավիճակի: 

Շատ լավ, հավատացեք, որ շատ լավ եմ զգում:

 Նախկինում լավ չէիք զգո՞ւմ:

 Լավ էր, հիմա ավելի լավ է…

Ինչո՞ւ  է հիմա ավելի լավ:

Այն ժամանակ ծանրաբեռնվածությունն ավելի շատ էր, հիմա ավելի շատ արտակարգ իրավիճակների  նախարարության հարցերով եմ զբաղվում, նորմալ է:

Ի՞նչ տարբերություն գերատեսչությունները միավորված են, թե առանձնացված: Ո՞րն  է բխում ոլորտի զարգացման շահերից:

Չգիտեմ, դա աշխատանք է, որը պետք է կատարվի: Եթե միացնում են ու պետք է աշխատես, պարտավոր ես աշխատել: Եթե առանձնացրել են նույնպես պիտի աշխատենք: Տարբերությունը ծանրաբեռնվածությունն է, որ  միացված է` ավելի ծանրաբեռնված է աշխատանքը, իսկ երբ առանձնացված է…  Ես գտնում եմ, որ երկու դեպքում էլ անելիքներ շատ կան:

Երբ միավորվում էր, մեկնաբանվեց, որ Ձեր դիրքերն են ուժեղացնում` ավելի մեծ լիազորությամբ օժտելով Ձեզ:

Չէ, էդպիսի բան չկար: Նախագահի մոտեցումը  բոլոր նախարարների նկատմամբ հավասար է,  եւ մենք էլ մեր առջեւ դրված խնդիրներն ենք կատարում:

Տարածքային կառավարման նախարարությունը ՀՅԴ-ին  տրամադրելուց հետո  դրա անվան դիմաց ավելացվեց  «զարգացման»  բառը` դառնալով Տարածքային կառավարման եւ զարգացման նախարարություն: Ինչո՞ւ Ձեր ղեկավարման օրոք այդ բառի անհրաժեշտությունը չկար եւ միայն դրանից հետո հավելվեց եւ առհասարակ ի՞նչ է փոխում  դա:

Չեմ կարող պատասխանել Ձեր հարցին, որովհետեւ հարցը  եթե լիներ Արտակարգ իրավիճակների նախարարությանն առնչվող, մեծ հաճույքով կպատասխանեի: Ես չգիտեմ` ինչի համար է այդ բառն ավելացել, պարոն Լոքյանին պետք է ուղղել այդ հարցը:

Լոքյանը բացատրում է, որ  այդ բառի հիմնական նպատակն է տնտեսապես խթանել մարզերը, որտեղ ՀՆԱ-ն շատ ցածր է, բացակայում են աշխատատեղերը, տնտեսությունը պակաս դիվերսիֆիկացված է եւ աղքատության տոկոսը մեծ է:  Այսինքն` անվան մեջ «զարգացման»   բառի բացակայությունը խոչընդո՞տ էր նշված խնդրի լուծմանը:

Թույլ տվեք այդ հարցերին չպատասխանել: Իմ նախարարությանն առնչվող հարցերին կպատասխանեմ մեծ հաճույքով, բայց հիմա քանի որ ես այդ նախարարության հետ առնչություն չունեմ,  իմ կողմից բացատրություն տալը կոռեկտ չի լինի:

Ամեն դեպքում, տարածքների համաչափ զարգացումն այդպես էլ չի  հաջողվում իրականություն դարձնել որեւէ նախարարի, ինչո՞ւ:

Գիտեք ինչ, դա մեծ գումարների հետ է կապված: Համաչափ զարգացումը շատ կարեւոր է, եթե դա չեղավ, կարծում եմ` մենք խնդիրներ կունենանք: Պետք է յուրաքանչյուր տեղ  ուսումնասիրել եւ ըստ այդմ քայլեր կատարել:

Երբ միավորվում էր  երկու նախարարությունը, շատ էր գրվում, որ նպատակ կա նաեւ ոստիկանությունը միավորելու` ստեղծելով Ներքին գործերի նախարարություն: ՏԿԱԻՆ-ի պառակտվելուց հետո թեման փակվե՞ց, թե ամեն դեպքում կստեղծվի ՆԳՆ:

Եղել են նման խոսակցություններ, ես նորմալ եմ վերաբերում, վաղ թե ուշ պետք է լինի ներքին գործերի նախարարություն: Կլինի, բայց թե այսօր, վաղը, թե 2018 թվականին կամ հետո, չգիտեմ, բայց դա անպայման պետք է լինի:

 Ինչո՞ւ անպայման պետք է լինի, դա ի՞նչ առավելություն ունի:

Դա կոորդինացնում է մի քանի ծառայություններ, որոնք կմիավորվեն ու կղեկավարվեն մի տեղից: Նորմալ է դա:

Օրինակ, ՆԳՆ-ի կազմում  ավելի արդյունավե՞տ կաշխատի ոստիկանությունը, ի՞նչ կփոխվի հատկապես:

Ես չէի ասի` ավելի լավ կլինի, ուղղակի ես ընդհանուր պահանջն եմ ասում, որ շատ երկրներում այդպես է: Ես կարծում եմ` վաղ թե ուշ մեզ մոտ էլ դա կլինի:

Ձեզ տեսնո՞ւմ եք այդ գերատեսչության ղեկավարի պաշտոնում:

Չեմ  կարող ասել, դա ինձանից կախված չէ, դա որոշում է երկրի նախագահը, ասեն` աշխատի, կաշխատեմ, չէ, կզբաղվեմ  իմ դասախոսությամբ:

Պարբերաբար շրջանառվում են լուրեր, որ ձգտում եք  ոստիկանապետի, նաեւ ստեղծվելիք ՆԳՆ ղեկավարի պաշտոնին:

Ոչ, Ճիշտ եմ ասում` ես նման նպատակ չունեմ: Ի՞նչ է տալիս  դա ինձ` որպես ղեկավարի: Այսօր էլ ես ուժային կառույցի ղեկավար եմ, գերծանրաբեռնված եմ… Որ ձգտեմ ոստիկանության պետ լինել կամ ներքին գործերի նախարար, չէ: Եթե նշանակեն, կաշխատեմ:

Պարոն Երիցյան, երկար տարիներ աշխատել եք ոստիկանության համակարգում, զբաղեցրել փոխոստիկանապետի պաշտոնը, լավ գիտեք համակարգի եւ կրիմինալ աշխարհի փոխհարաբերությունները: Վերջին օրերին լրահոսը հեղեղված է ոստիկանապետ Վլադիմիր Գասպարյանի ելույթներով, որ կրիմինալի դեմ պատերազմ է հայտարարում: Ինչ եք կարծում,  իրականում կհաջողվի՞ արդյունավետ իրականացնել այդ գործընթացը:

Կարծում եմ`հարցը պետք է ուղղել Վլադիմիր Գասպարյանին, եթե հայտարարություն է անում, ինքը գիտի իր պոտենցիալը, իր հնարավորությունները եւ կարող է այդ հարցին պատասխանել: Ոստիկանությունը միշտ էլ պայքարել է ու շարունակելու է պայքարել:

Բայց կհաջողվի՞…

 Իհարկե:

Քաղաքական շրջանակներում կանխատեսումներ կան, որ բավականին դժվար իրավիճակ է լինելու ընտրությունների ժամանակ, շատերի քաղաքական ճակատագիրն անորոշ է: Ձեզ ի՞նչ է սպասվում, 2017-ից հետո, ո՞ր կուսակցության շարքերում եք լինելու, գործադիրո՞ւմ, խորհրդարանո՞ւմ:

Ես չեմ կարող ասել, ես ավելի պրակտիկ եմ, այսօր նախարար եմ, նախարարության առջեւ դրված խնդիրներն եմ կատարում, թե վաղը ինչ կլինի, կյանքը ցույց կտա:

ՕԵԿ-ից դուրս գալուց հետո այլ կուսակցություն անդամագրվելու առաջարկ դեռ չկա՞:

 Ոչ , ոչ, ոչ…