Նախագահ Սերժ Սարգսյանն այսօր ընդունել է Քուվեյթի Պետության արդարադատության նախարար, Վակֆերի եւ իսլամական հարցերի նախարար Յակուբ Աբդուլմոհսեն Ալ-Սանեայի գլխավորած պատվիրակությանը:

Հանրապետության նախագահը գոհունակությամբ է արձանագրել, որ Հայաստանի եւ Քուվեյթի միջեւ հարաբերությունները զարգանում են բնականոն հունով, տարեցտարի ընդլայնվում է երկկողմ համագործակցության օրակարգը: Սերժ Սարգսյանը ջերմությամբ է հիշել 2009թ. Քուվեյթի Պետություն կատարած իր պետական այցը, որի արդյունքում զգալիորեն ակտիվացել են երկու ժողովուրդների դարավոր բարեկամության հիմքի վրա խարսխված միջպետական հարաբերությունները, Հայաստանում եւ Քուվեյթում բացվել են դեսպանություններ, արդեն կայացել է միջկառավարական հանձնաժողովի երկու նիստ՝ նախանշելով փոխգործակցության զարգացման նոր հնարավորություններ:

Հանրապետության նախագահը հայ-քուվեյթյան հարաբերությունների ամրապնդման գործում մեծ դեր է վերապահել Հայաստանում եւ Քուվեյթում դիվանագիտական ներկայացուցչություններին՝ հույս հայտնելով, որ նրանք այսուհետ ավելի կակտիվացնեն իրենց ջանքերը: Սերժ Սարգսյանը կարեւորել է բարձր մակարդակի քաղաքական, տնտեսական, մշակութային հարաբերություններին զուգահեռ արդարադատության ոլորտում զարգացող համագործակցությունը, որի հիմքը դրվել է նախարար Յակուբ Աբդուլմոհսեն Ալ-Սանեայի այցի շրջանակներում ստորագրված միջպետական համաձայնագրով:

Հանրապետության նախագահը շնորհակալություն է հայտնել Քուվեյթի էմիր Շեյխ Սաբահ Ալ-Ահմադ Ալ-Սաբահին եւ երկրի կառավարությանը՝ Քուվեյթի հայ համայնքի նկատմամբ հոգատար ու բարյացակամ վերաբերմունքի, ինչպես նաեւ մերձավորարեւելյան ճգնաժամի հետեւանքով տուժած սիրիացիներին տրամադրվող օգնության շրջանակներում սիրիահայերին եւս Քուվեյթի Պետության կողմից ցուցաբերվող աջակցության համար:

Քուվեյթի արդարադատության նախարարը շնորհակալություն է հայտնել ՀՀ Նախագահին ջերմ ընդունելության համար եւ նշել, որ համակարծիք է կարճ ժամանակահատվածում երկու բարեկամ պետությունների հարաբերություններում արձանագրված առաջընթացի վերաբերյալ Հայաստանի նախագահի գնահատականին: Նախարարը կարեւորել է բարձր մակարդակով ձեռք բերված հայ-քուվեյթյան պայմանավորվածությունները եւ մինչ այժմ ստորագրված փաստաթղթերը կյանքի կոչելու ուղղությամբ երկու կողմերի պատասխանատու պաշտոնյաների ակտիվ աշխատանքը, ինչպես նաեւ այդ նպատակով միմյանց հետ սերտ փոխգործակցության հաստատումը: Նա հույս է հայտնել, որ իր այցի ընթացքում ստորագրված համաձայնագիրը համագործակցությունն ընդլայնելու եւ նոր ստորագրվելիք փաստաթղթերի հիմք կդառնա։