Ռուսաստանի արտգործնախարարության պաշտոնական ներկայացուցիչ Մարիա Զախարովան մանրամասներ է պատմել Սերգեյ Լավրովի եւ Ջոն Քերրիի հանդիպումից: Զախարովայի խոսքով, շփման սկզբում ԱՄՆ-ի պետքարտուղարը շնորհավորել է Ռուսաստանի արտգործնախարարի ծնունդը, հայտնում է «ՌԻԱ Նովոստին»: 

«Հույս ունեմ, որ այսօրվա մեր զրույցը հաջող կլինի: Ուզում եմ այս պահն օգտագործել` շնորհավորելու ծննդյանդ տարեդարձը: Հույս ունեմ, որ այս ամսաթիվը քեզ լրացուցիչ իմաստնություն կհաղորդի այս բանակցությունների անցկացման գործում:  39 տարեկանի համար դու հոյակապ տեսք ունես», — ասել է Քերրին:

Ռուսաստանի եւ ԱՄՆ-ի դիվանագիտական գերատեսչությունների ղեկավարներն այնուհետեւ սրամիտ դիտարկումներ են փոխանակել. «Ջոն, շնորհակալ եմ, բայց եթե իմաստնությունը ծննդյան տարեդարձների քանակով չափենք, ես քո հետեւից չեմ հասնի»,- ասել է Լավրովը:

Պատվիրակությունները ծիծաղով են ընդունել այդ խոսքերը:  «Եթե ավագներին հարգես, ամենակարեւորը դա է»,- հետադարձել է Քերրին:

Մարտի 21-ին  լրացել է Լավրովի 66 տարին, իսկ անցյալ տարվա վերջին Քերրիի   72 տարին էր լրացել:

Նախօրեին Քերրին Ռուսաստանի մայրաքաղաք է եկել երկօրյա այցով: Սա տարվա ընթացքում ամերիկյան արտաքին գերատեսչության ղեկավարի արդեն երրորդ այցն է Ռուսաստան:  Առաջին երկու աշխատանքային ուղեւորությունների ընթացքում` մայիսին` Սոչի եւ դեկտեմբերին` Մոսկվա, Քերրին բանակցություններ էր անցկացրել Լավրովի եւ Պուտինի հետ: