Շնող գյուղում ազգականին դաժանորեն սպանելու մեջ կասկածվող 23-ամյա երիտասարդին մեղադրանք է առաջադրվել:

Ըստ Քննչական կոմիտեի տարածած հաղորդագրության, մայիսի 9-ի լույս 10-ի գիշերը՝ ժամը 02:00-ի սահմաններում, ահազանգ է ստացվել, որ Լոռու մարզի Շնող գյուղում տուն է այրվում: Դեպքի վայր է մեկնել քննչական- օպերատիվ խումբը, եւ պարզվել է, որ այրվել է նույն գյուղի 56-ամյա բնակչուհու տան ննջասենյակը, որտեղ հայտնաբերվել է տանտիրուհու դին՝ կիսաայրված վիճակում:

Ձեռնարկված անհետաձգելի քննչական գործողությունների արդյունքում պարզվել է, որ դեպքի օրը կնոջն է այցելել նրա հեռավոր ազգականը (23 տարեկան)՝ հարբած։ Նախնական տվյալներով՝ երիտասարդը կնոջն առաջարկել է սեռական հարաբերություն ունենալ, սակայն մերժում ստանալով՝ բռնություն է գործադրել նրա նկատմամբ եւ սպանել։ Ձեռք բերված ապացույցների համաձայն՝ երիտասարդը կպչուն ժապավենով փակել է կնոջ բերանը, կապել ձեռքերը եւ սրբիչի գործադրմամբ փակելով շնչառական ուղիները՝ խեղդել։

Կնոջ մահից հետո առանձնատան երկու սենյակների անկողիններն այրելու միջոցով փորձ է արվել հրկիզել տունը, սակայն մեղադրյալի կամքից անկախ հանգամանքներով, հանցագործությունն ավարտին չի հասցվել. տուժածի դիակն ու անկողիններն ամբողջությամբ չեն այրվել։

Ձեռք բերված ապացույցների հիման վրա՝ 23-ամյա երիտասարդին մայիսի 12-ին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով (սպանություն) եւ 34-185-րդ հոդվածի 2-րդ մասի 1-ին կետով (հրկիզման եղանակով գույքը դիտավորյալ ոչնչացնելու փորձ)։ Նույն օրը քննիչը միջնորդություն է ներկայացրել դատարան՝ նրա նկատմամբ որպես խափանման միջոց կալանավորումը կիրառելու վերաբերյալ, ինչը բավարարվել է։

Նախաքննությունը  շարունակվում է: Քրեական գործով էական նշանակություն ունեցող մի շարք հանգամանքների պարզաբանման համար նշանակվել են փորձաքննություններ։