Հայաստանի մշակույթի նախարարությունը եւ Ազգային ժողովի «Բաց դռներ» մշակութային հիմնադրամը անցկացնում են ասմունքի հանրապետական մանկապատանեկան մրցույթ-փառատոն, որը նվիրվում է հայ մեծանուն բանաստեղծ Վահան Տերյանի ծննդյան 125-ամյակին:

ԱԺ մամուլի ծառայությունից NEWS.am-ին հայտնում են, որ մրցույթ-փառատոնն առաջին անգամ անցկացվել  է 2009 թվականին, կրկին ՀՀ ԱԺ նախագահ Հովիկ Աբրահամյանի հովանու ներքո:

Մրցույթ-փառատոնն անցկացվում է երեք փուլով, երկու տարիքային խմբով, այն կեզրափակվի  Երեւանում:  Փառատոնը հյուրընկալվելու է նաեւ Ջավախքում:

Հայաստանի մարզերի, Ջավախքի եւ Արցախի դպրոցների 11-17 տարեկան հազարավոր դպրոցականներ արդեն մասնակցել են փառատոնի առաջին փուլին: Հոկտեմբերի 1-ին  Սեւանում մեկնարկել է փառատոնի երկրորդ` մարզային փուլը, որին ներկա էին նաեւ ԱԺ պատգամավորներ Հրանտ Մադաթյանը եւ Տաճատ Վարդապետյանը:

ՀՀ մշակույթի նախարարության ներկայացուցիչ Կարո Վարդանյանը շատ կարեւոր է համարել Վահան Տերյան բանաստեղծի գնահատումը նաեւ պետական բարձր շրջանակների կողմից, եւ դրա վառ վկայությունն անցկացվող այս փառատոնն է:

Գեղարքունիքի մարզի դպրոցների  շուրջ 30 աշակերտներ արտասանել են Վահան Տերյանի  ստեղծագործություններից:

Մրցույթ- փառատոնի ավարտին ժյուրին որոշել է 6 հաղթողներին, որոնք  կմասնակցեն  փառատոնի` Երեւանում անցկացվելիք եզրափակիչ փուլին: