նախընտրելի դարձնել
IKEA ընկերությունը հետ է կանչում մոտավորապես 29 մլն կոմոդ եւ պահարան, որոնք պատրաստվել են սկսած 2002 թվականից` դրանց ընկնելու վտանգի պատճառով, ինչը շատ վտանգավոր է երեխաների համար, հայտնում է «ՌԻԱ Նովոստին»:
CPSC-ի` Սպառողական ապրանքների անվտանգության հանձնաժողովի տվյալներով առնվազն 36 երեխա տուժել է պահարանների ընկնելու հետեւանքով, իսկ զոհերի թիվը վեց մարդ է կազմում:
IKEA-ն նշում է, որ կոմոդները եւ պահարաններն անհրաժեշտ է պատին ամրացնել, հակառակ դեպքում դրանք կընկնեն: Ընկերությունը սպառողներին առաջարկում է վերադարձնել կահույքը կամ ինքնուրույն նորոգել այն: Գնորդների ցանկությամբ ընկերությունն իր աշխատողների խումբ կուղարկի պատերին ամրակներ ամրացնելու համար:
IKEA-ն աշխարհում կահույքի եւ տնային կենցաղային իրերի առեւտրի խոշորագույն մանրածախ ցանցն է, որը հիմնադրվել է 1943-ին` Շվեդիայում: Խումբը 2014-ի օգոստոսի տվյալներով 315 խանութ ունի աշխարհի 27 երկրում: Այսօրվա դրությամբ Ռուսաստանի 11 խոշորագույն շրջանում 14 «Մեգա» առեւտրի կենտրոն է բացված, որոնցից յուրաքանչյուրի կազմի մեջ IKEA խանութ է մտնում:
