Գերմանիան Հայաստանի երրորդ առեւտրատնտեսական գործընկերն է: Այս մասին, այսօր՝ հոկտեմբերի 5-ին, Գերմանիայի Բունդեսթագի փոխնախագահ Յոհաննես Զինգհամմերի հետ հանդիպման ժամանակ նշել է ՀՀ ԱԳ նախարար Էդվարդ Նալբանդյանը:

ԱԳՆ-ից NEWS.am-ին հայտնում են, որ ոողջունելով ներկայացուցչական պատվիրակության այցը Հայաստան` նախարար Նալբանդյանը նշեց, որ Գերմանիայի օրենսդիր մարմնի պատգամավորների հաճախակի այցելությունները Հայաստան վկայում են խորհրդարանական դիվանագիտության ակտիվության եւ դրա կարեւորության մասին։

Էդվարդ Նալբանդյանն ընդգծեց, որ արդյունավետ փոխգործակցություն է հաստատվել ինչպես երկու երկրների գործադիր իշխանությունների, այնպես էլ` օրենսդիր մարմինների միջեւ։ Օգտվելով առիթից` նախարար Նալբանդյանը երախտագիտություն հայտնեց Հայոց ցեղասպանության ճանաչման ու դատապարտման վերաբերյալ Բունդեսթագի բանաձեւի ընդունման եւ այդ հարցում գերմանացի օրենսդիրների ցուցաբերած սկզբունքային դիրքորոշման համար։

Հայաստանի արտաքին քաղաքական գերատեսչության ղեկավարը գոհունակությամբ արձանագրեց նաեւ, որ Գերմանիան Հայաստանի երրորդ առեւտրատնտեսական գործընկերն է եւ առաջինը՝ Եվրոպական միության անդամների շարքում։

Շնորհակալություն հայտնելով իր գլխավորած պատվիրակությանն ընդունելու համար` Յոհաննես Զինգհամմերը ներկայացրեց գերմանացի խորհրդարանականների այցելության նպատակները եւ ունեցած հանդիպումների արդյունքները։

Հյուրերի խնդրանքով նախարար Նալբանդյանը ներկայացրեց Հայաստան - Եվրոպական միություն հարաբերությունները, դրանց նոր իրավական հիմքի շուրջ ընթացող բանակցությունները։

Հայաստանի արտաքին քաղաքական գերատեսչության ղեկավարն անդրադարձավ Մերձավոր Արեւելքում առկա իրավիճակին, այդ տարածաշրջանում փոքրամասնությունների խնդիրներին, ահաբեկչության դեմ պայքարին, միգրացիոն հոսքերին, մի շարք այլ տարածաշրջանային գործընթացների վերաբերյալ Հայաստանի մոտեցումներին։

Էդվարդ Նալբանդյանը Բունդեսթագի պատվիրակությանը ներկայացրեց ս.թ. ապրիլին Արցախի դեմ Ադրբեջանի սանձազերծած ագրեսիայի հետեւանքների վերացմանը եւ ղարաբաղյան հիմնախնդրի խաղաղ կարգավորման գործընթացի առաջընթացին ուղղված Հայաստանի եւ ԵԱՀԿ Մինսկի խմբի համանախագահ երկրների կողմից գործադրվող ջանքերը։