նախընտրելի դարձնելՀանրապետական խմբակցության քարտուղար Գագիկ Մելիքյանը պնդում է, որ իշխանությանը հաջողվելու է մինչեւ ապրիլյան խորհրդարանական ընտրություններ ընտրողներին ներկայանալ շոշափելի բարեփոխումներով, օրինակ կոռուպցիայի ու ստվերի կրճատված շոշափելի զգալի արդյունքներով:
NEWS.am-ի հետ զրույցում նա շեշտեց, որ կառավարության նոր ծրագիրը Սերժ Սարգսյանի փետրվարի 12-ի ելույթի հիմնադրույթներից է բխում, որը պետք է կյանքի կոչի այս կառավարությունը առաջիկա ամիսների ընթացքում:
«Այն հիմնադրույթները, որ դրված են այս նախնական ծրագրում, իրագործելի են: Դրանք առաջնահերթ են նախ այն առումով, որ բարձրացված են հրատապ ծրագրային խնդիրներ, որոնք հանրապետության նախագահի փետրվարի 12-ի ելույթի կետերն են՝ ամփոփված այս ծրագրում կատարման առումով»,-ասաց պատգամավորը:
Հարցին՝ կառավարության նոր ծրագրում նախանշված ո՞ր խնդիրներն են, որ Կարեն Կարապետյանը պետք է լուծի մինչեւ ապրիլյան ընտրությունները, որպեսզի իշխող Հանրապետական կուսակցությունը փորձի քաղաքացու քվեն ստանալ, Մելիքյանը պատասխանեց. «Կնշեմ հիմնականը. պայքար ստվերային տնտեսության դեմ, որը հնարավոր է շատ կարճ ժամանակում իրականացնել, պայքար կոռուպցիայի դեմ, որն հնարավոր է շատ կարճ ժամանակում իրականացնել այս 6-7 ամիսների ընթացքում: Դրանով իսկ ապահովել նաեւ տնտեսական որոշակի աճ եւ բյուջեի մուտքերի աճ: Բացի սրանից, ամենակարեւորն եմ նշում՝ նաեւ ծախսերի խիստ կրճատում, անարդյունավետ հավելյալ արժեք չստեղծող ծախսերի կրճատում, որին բավականին լուրջ ուշադրություն են դարձնելու»,-ասաց իշխող կուսակցության ներկայացուցիչը:
Նա շեշտեց, որ մինչեւ գարուն քաղաքացին իր մաշկի վրա զգալու է այդ փոփոխությունները:
«Քաղաքացին զգալու եւ տեսնելու է այն գործընթացը, որ ամեն ինչ իրականացվելու է հավասարության սկզբունքով: Տեսնելու ենք, որ փետրվարի 12-ի ելույթից հետո տեղի է ունենալու դրական արդյունքներ»,-ասաց ՀՀԿ-ական պատգամավորը:
Նշենք, որ իշխող Հանրապետական կուսակցությունը երեկ խորհրդի նիստում քննարկում էր կառավարության նոր ծրագիրը, որը պետք է ներկայացվի Ազգային ժողովի հաստատմանը:
