նախընտրելի դարձնելՖրանսիացի եւ ամերիկացի գիտնականների խումբը հետազոտություն է իրականացրել, որի հետեւանքով հօդս է ցնդել Անտոնիո Ստրադիվարիուսի (1644-1737) ջութակների՝ ժամանակակիցներից ավելի լավ հնչելու առասպելը։ Այս մասին հայտնել է AFP գործակալությունը՝ վկայակոչելով ԱՄՆ Գիտությունների ազգային ակադեմիային:
Հետազոտության ժամանակ փորձարկվել են Ստրադիվարիուսի երեք ջութակներ եւ մինչեւ 10 տարեկան երեք ժամանակակից գործիքներ։ 137 մարդու մասնակցությամբ գիտափորձերը տեղի են ունեցել Փարիզի եւ Նյու Յորքի համերգասրահներում։
Գիտափորձի ընթացում լսարանը նախընտրել է նոր գործիքները։ Ջութակահարներն իրենք, ովքեր գործիքներն ընտրել են առանց դրանց ծագումն իմանալու, եւս ընտրություն են կատարել հօգուտ ժամանակակից ջութակների։
Աշխարհում պահպանվել է Ստարդիվարիուսի արհեստանոցում նրա կենդանության օրոք ստեղծված մոտ 650 տարբեր տեսակի գործիքներ։ Դրանցից 512-ը ջութակներ են։
Մի քանի միլիոն դոլարի հասնող Ստրադիվարիուսի ջութակների գները որոշվում են ոչ միայն դրանց ֆիզիկական վիճակից, այլեւ ելնելով այն ժամանակից, երբ դրանք պատրաստվել են։
