նախընտրելի դարձնելԱրմավիրի «Մանուշակ» մանկապարտեզում տեղի ունեցած միջադեպից հետո Արմավիրի հիվանդանոց է տեղափոխվել երեք մարդ. Պատանդառու տղամարդը, նրա նախկին կինն ու երեքամյա երեխան: Այս մասին լրագրողներին հայտնել է հիվանդանոցի բժիշկ Սլավիկ Խաչատրյանը:
Նրա խոսքով, պատանդառուն այս պահին վիրահատարանում է, նա կրծքավանդակի շրջանում ունի վնասվածք, վիրահատում են. «Ինքն իրեն դանակահարել է, կրծքավանդակի շրջանում: Ուսումնասիրելուց հետո պարզվեց, որ պետք է վիրահատել:
Նրա նախկին կինը ձեռքի երկու մատների շրջանում ունի ջլերի վնասվածք եւ պետք է տեղափոխվի Երեւան՝ միկրովիրաբուժության կենտրոն: Բացի այդ, մակերեսային վերք կա պարանոցի շրջանում եւ կրծքավանդակի աջ կեսում»,-ասաց Խաչատրյանը:
Բժշկի փոխանցմամբ, երեխան որեւէ վնաս չի կրել, նրա համար հոգեբան են կանչել:
Հարցին, թե պատանդառու տղամարդու կյանքին վնաս սպառնո՞ւմ է, բժիշկը պատասխանեց. «Չենք կարող ասել, թափանցող վերք է, վիրահատությունից հետո կերեւա»:
Նշենք, որ այսօր՝ հոկտեմբերի 30-ին, ժամը 16.25-ին ոստիկանության Արմավիրի բաժին ահազանգ է ստացվել, որ մի տղամարդ դանակով զինված ներխուժել է Արմավիր քաղաքի «Մանուշակ» մանկապարտեզ: Տղամարդը դանակի սպառնալիքով մանկապարտեզում էր պահում 3-ամյա երեխայի:
Նրա հետ բանակցություններ են վարել իրավապահ մարմինների ներկայացուցիչները, այդ թվում ՀՀ փոխոստիկանապետ Հունան Պողոսյանը:
Բանակցությունների ընթացքում ոստիկանության ծառայողներին հաջողվել է երեխային անվնաս հանել սենյակից, նրան դիմավորել են ծափահարություններով:
Րոպեներ անց ոստիկանները մգեցված ապակիներով մեքենայով շենքից դուրս են բերել պատանդառուին, այնպես, որ ոչ ոք հնարավորություն չունենա տեսնելու նրա դեմքը:
Լուրեր կան, որ տղամարդը նախկին կնոջն ու երեխային տեսնելու պահանջով էր դանակով մտել մանկապարտեզի շենք՝ փորձելով այս կերպ վրեժխնդիր լինել նախկին զոքանչից, որովհետեւ թույլ չէին տալիս տեսակցել երեխային:
Ոստիկանությունն այս տեղեկությունները չի հաստատում, նրանք ասում են միայն, որ տղամարդը անձնական պատճառներ է ունեցել, սակայն չեն մանրամասնում:
Թեեւ ոստիկանությունը գաղտնի է պահում տղամարդու ինքնությունը, սակայն նախնական տվյալներով, նա Արմավիր քաղաքի բնակիչ Արգամ Հովիկյանն է:
