նախընտրելի դարձնելՀՀ հատուկ քննչական ծառայության քննիչի վարույթին է հանձնվել ՀՀ քննչական կոմիտեում ավելի քան 6 ամիս քննված քրեական գործը, որի նյութերի ուսումնասիրությամբ պարզվել է, որ 05.06.2017թ.-ին` Երեւանի Կոմիտասի անվան զբոսայգում տեղի ունեցած վիճաբանության ժամանակ, Թ. Խշոյանը սուր կտրող-ծակող գործիքով հարվածներ է հասցրել Մ. Եղիկյանին եւ ՀՀ ոստիկանության աշխատակից Է. Բերբերյանին` վերջիններիս պատճառելով ծանր մարմնական վնասվածքներ:
Դեպքի առթիվ 06.06.2017թ.-ին ՀՀ քննչական կոմիտեի ԵՔՔՎ Շենգավիթ վարչական շրջանի քննչական բաժնում ՀՀ քրեական օրենսգրքի 112-րդ հոդվածի 2-րդ մասի 1-ին կետով հարուցվել է քրեական գործ, որի շրջանակներում Թ. Խշոյանին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է կիրառվել կալանավորումը:
Նախաքննության ընթացքում մեղադրյալ Թ. Խշոյանը հայտնել է, որ վիճաբանության ժամանակ 5-6 անձինք իրեն ծեծի են ենթարկել եւ պատճառել մարմնական վնասվածքներ, որոնց վերաբերյալ որոշակի տվյալներ նախաքննության ընթացքում չի հայտնել, սակայն միջադեպից շուրջ 6 ամիս անց` 04.12.2017թ.-ին, ցուցմունք է տվել, որ իրեն ծեծի ենթարկած անձանց թվում եղել է ոստիկանության աշխատակից Է. Բերբերյանը:
Թ. Խշոյանին ծեծի ենթարկելու եւ առողջությանը թեթեւ վնաս պատճառելու դեպքերի առթիվ 07.12.2017թ.-ին ՀՀ ՔԿ ԵՔՔՎ Շենգավիթ վարչական շրջանի քննչական բաժնում ՀՀ քրեական օրենսգրքի 118-րդ եւ 117-րդ հոդվածներով հարուցվել է քրեական գործ, որը միացվել է նույն բաժնում ՀՀ քրեական օրենսգրքի 112-րդ հոդվածի 2-րդ մասի 1-ին կետով քննվող քրեական գործին եւ քննչական ենթակայության կարգով ուղարկվել ՀՀ հատուկ քննչական ծառայություն:
Նախաքննությունը շարունակվում է:
