Վրաստանի կառավարության շենքում օրերս կայացել է Վրաստանի հաշտության եւ  քաղաքացիական հավասարության հարցերով պետական նախարար Քեթեւան Ցխելաշվիլիի հանդիպումը Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի հետ:

Վիրահայոց թեմից NEWS.am-ին հայտնում են, որ հանդիպմանը  պետնախարար Ցիխելաշվիլին ողջունելով հյուրերին, ընդգծեց, որ  ուրախ է  իրեն այցելելու համար եւ պատրաստ է  լսելու ու քննարկելու  բոլոր այն հարցերը, որոնք անհանգստացնում են Վիրահայոց թեմին:

Տիկին նախարարը առանձնահատուկ նշեց հայ երիտասարդների ակտիվ մասնակցությունը 1+4 կրթական ծրագրին, ինչպես նաեւ  ընդգրկվածությունը  վերապատրաստման եւ փորձի ձեռք բերման տարբեր  ծրագրերին: Պետնախարարը  հույս հայտնեց, որ այս երիտասարդները  տարածաշրջաններ վերադառնալուց հետո իրենց օգտակարությունը կբերեն տեղի բնակչությանը:

Հանդիպման ընթացքում կայացավ Թեմակալ առաջնորդի կողմից  առաջադրված երեք հիմնական հարցերի քննարկումը: Առաջինը Գումբուրդոյի եկեղեցու բակում վերաթաղված ոսկորների վրա հուշաքարի տեղադրման մասին անցած՝ 2017 թվականին ձեռք բերված եռակողմ բանավոր պայմանավորվածության հարցն էր:

Վազգեն Սրբազանը առաջարկեց չուշացնել Պատրիարքարանի, կառավարության եւ Թեմի  միջեւ բանավոր պայմանավորվածության համաձայն գրավոր հուշագրի ստորագրումը՝ դյուրացնելու համար  հետագա խնդիրների լուծումը:

Երկրորդ հարցով զրույցը վերաբերեց Թանդոյանց Սուրբ Աստվածածին եկեղեցու  շուրջ ստեղծված իրավիճակին:  Վիրահայոց թեմի առաջնորդը առաջարկեց Հաշտության եւ քաղաքացիական հավասարության նախարարությանը՝ ի դեմս պետնախարար Քեթեւան Ցիխելաշվիլիի, գործնական մասնակցություն  բերել խնդիրը համերաշխությամբ եւ փոխադարձ ըմբռնումով լուծելու համար:

Որպես երրորդ հարց Թեմակալ առաջնորդը խնդրեց  նախարարի միջամտությունը  Վրաստանում գործող փաստացի հայկական եկեղեցիները, որոնց ամբողջական փաթեթը ներկայացված է կառավարությանը, իրավաբանորեն Վիրահայոց թեմին վերադարձնելու հարցին:

Հանդիպման ավարտին նախարար Ցիխելաշվիլին  խոստացավ խնդրո  այս երեք հարցերը ուսումնասիրել, անդրադառնալ եւ օգնել դրանց լուծմանը:

Պետնախարարը կարեւորեց հայ համայնքի ընդգրկվածությունը վրաց հասարակությանը եւ ընդգծեց, որ պետք է  արվի ամեն ինչ, որպեսզի որեւէ մեկը չզգա, որ Վրաստան աշխարհում իր իրավունքները ոտնահարվում են:

Վիրահայոց թեմի առաջնորդն իր գնահատանքն ուղղեց Վրաստանի պետնախարարին վիրահայ համայնքին հուզող  հարցերը ունկնդրելու  համար եւ հույս հայտնեց, որ բոլորի ջանքերով  խնդիրները  կստանան  համապատասխան  լուծում:

Վրաստանի հաշտության եւ քաղաքացիական  հավասարության հարցերի պետական նախարար Քեթեւան Ցիխելաշվիլիի հետ հանդիպմանը Վիրահայոց թեմի առաջնորդին ընկերակցում էր Թեմի Իրավական հարցերի եւ համագործակցության բաժնի  տնօրեն Միքայել Ավագյանը: