նախընտրելի դարձնել
Քիչ առաջ NEWS.am էին զանգահարել Գյուլբենկյան-Սունդուկյան փողոցների խաչմերուկում տեղակայված «Գլուբուս 2» արտադրական կազմակերպության գյուղմթերքների փոքր շուկայի առեւտրականները եւ ահազանգում էին իրենց դեմ իրականացված «օպերացիայի» մասին: Ըստ այդմ` վաղ առավոտից իրենց են մոտեցել մեծ թվով ոստիկաններ` Արաբկիր թաղապետարանի ներկայացուցիչների ուղեկցությամբ, եւ փորձել են նրանց հանել շուկայից եւ հայտարարել, թե կատարում են փողոցային առեւտուրն արգելելու Երեւանի քաղաքապետարանի որոշումը:
Ոստիկանները սկսել են ապամոնտաժել տաղավարները: Նրանց գործողություններին միջամտել է շուկայի տնօրեն Արամ Խաչատրյանը, ինչից հետո առեւտրականները կրկին շարունակել են առեւտրի իրականացումը: NEWS.am-ի թղթակցի հետ զրույցում Արամ Խաչատրյանը նշել է, որ շուկան գործում է 1999 թվականից` քաղաքապետարանի թույլտվությամբ: դեռեւս Երեւանի նախկին քաղաքապետ Երվանդ Զախարյանի օրոք շուկայի գործունեության թույլտվությունը երկարաձգվել է 20 տարով:
«Ես ունեմ քաղաքապետարանի օրինական որոշումը, ըստ որի իրավունք ունեմ մինչեւ 2024 թվականը շահագործել գյուղմթերքների շուկան: Հիմա եկել են Արաբկիրի թաղապետարանի ինչ-որ ներկայացուցիչներ եւ պահանջում են առեւտուրը դադարեցնել, ինչի իրավունքը չունեն»,-NEWS.am-ի թղթակցի հետ զրույցում ասաց Խաչատրյանը` ցույց տալով համապատասխան փաստաթղթերի մի ողջ տրցակ: Նա նաեւ հատուկ ընդգծեց, որ քաղաքապետարանի որոշումը չի կարող տարածվել իրենց վրա, քանի որ իրենք զբաղվում են ոչ թե փողոցային առեւտրի կազմակերպմամբ, այլ օրինական շուկա են:
Ոստիկանները, ում նույնպես շուկայի տնօրենը ցույց է տվել փաստաթղթերի նույն տրցակը, համառել են, ասելով, թե իրենց չեն հետաքրքրում դրանք եւ հայտարարել` «դավայ եղեք ստուց»:
Այս պահին նշված շուկայում իրարանցում է, շուկայի աշխատակիցները վիճաբանությնա մեջ են մտել ոստիկանության ներկայացուցիչների հետ: Չի բացառվում, որ տեղի ունենան ավելի կոշտ գործողություններ:
