նախընտրելի դարձնելԵրեւանի ավագանու ընտրություններում հաղթանակի դեպքում ՀՅԴ-ի խնդիրը կլինի մայրաքաղաքի ռեսուրսների արդյունավետ կառավարումը: Այս մասին սեպտեմբերի 17-ին լրագրողների հետ հանդիպման ժամանակ հայտարարեց ՀՅԴ-ից Երեւանի ավագանու անդամի թեկնածու Դավիթ Հակոբյանը:
Դրա համար, նրա խոսքով, կուսակցությունը պրոֆեսիոնալ թիմ է հավաքել, որի խոստումները եւ նպատակները իրատեսական են՝ ի տարբերություն այլ քաղաքական ուժերի, որոնք 4 տարի անց պետք է պատասխանեն իրենց չիրականացված ծրագրերի համար:
«Սեւ փիարը, որն իրականացվում է գենետիկ հակադաշնակների կողմից, ՀՅԴ-ին հետապնդել է ողջ պատմության ընթացքում: Չնայած դրան մեր հիմնական առավելությունն այլ քաղաքական ուժերի համեմատ 128-ամյա փորձի մեջ է», -ասել է Հակոբյանը:
Կուսակցությունը, շարունակեց նա, չի խոստանում լուծել Երեւանի խնդիրները սեփական ռեսուրսների կամ ներգրավված օտարեկրյա ներդրումների հաշվին, նրա նպատակը՝ մայրաքաղաքի բյուջեի օգտագործման արդյունավետությունը բարձրացնելն է:
«Կարեւորը, որ ընտրությունների արդյունքները չհանգեցնեն հանրության բեւեռացմանը, մանավանդ, որ բոլոր քաղաքական ուժերը մտահոգված են Երեւանի խնդիրներով», - եզրափակեց Դավիթ Հակոբյանը:
ՀՅԴ-ից Երեւանի ավագանու անդամի մեկ այլ թեկնածու՝ Պարույր Սանթրոսյանն, իր հերթին, նկատեց, որ Երեւանը կորցրել է «թամանյանական գաղափարախոսությունը», որի համաձայն, մայրաքաղաքը համահայկական պատմամշակութային կենտրոն է եւ դրան հարկավոր է վերադառնալ:
«Շարունակելով շրջանները եւ թաղամասերը Արեւմտյան Հայաստանի շրջանների եւ քաղաքների պատմական անուններով անվանելու ավանդույթը, Երեւանը նաեւ պետք է բաց հարթակ դառնա երիտասարդ կինո եւ թատերասեր գործիչների համար», - նկատեց Սանթրոսյանը:
Նրա խոսքով, ընտրազանգվածը պետք է որոշի, թե որքանով են իրատեսական ընտրություններին մասնակցող 12 քաղաքական ուժերի նախընտրական ծրագրերը: «Ամենակարեւորը թափանցիկ, արդար ընտրությունների անցկացումն է, որի արդյունքները բոլորի կողմից ընդունվելու են», - ավելացրեց նա:
Հիշեցնենք, որ Երեւանի ավագանու ընտրությունները կանցկացվեն սեպտեմբերի 23-ին:
