նախընտրելի դարձնել
«Թոշակառու Մանկավարժներ Առանց Սահմանի (GREF)» ֆրանսիական կազմակերպության 12 անդամներ, ֆրանսերենի նախկին ուսուցիչներ, մարտի 7-ից ապրիլի 17-ը, արդեն 13-րդ անգամ, կժամանեն Հայաստան, երկրի ողջ տարածքում ֆրանսերենի ուսուցիչների վերապատրաստում անցկացնելու համար:
Նրանց առաքելությունը կսկսվի մարտի 7-ին, ժամը 10-ին Հայաստանում Ֆրանսիայի Դեսպանությունում կայանալիք աշխատանքային ժողովով, այնուհետեւ դեսպան Անրի Ռենոյի հրավերով կկայանա ճաշ հայ եւ ֆրանսիացի գործընկերների մասնակցությամբ:
GREF-ը գործել է Հայաստանում 1996-2000թթ.-ին, ապա վերսկսել է իր գործունեություն 2005թ.-ից, ոչ միայն Երեւանում, այլ նաեւ մարզերում:
2010թ.-ին Ստեփանավանի, Վանաձորի, Գյումրիի, Արթիկի, Մաստարայի, Չարենցավանի Հրազդանի, Գորիսի եւ Երեւանի 184 ուսուցիչներ մասնակցել են GREF-ի վերապատրաստման դասընթացներին:
GREF-ը ստեղծվել է 1990թ.ին եւ գործունեություն է ծավալում ողջ աշխարհում:
Բոլորովին վերջերս, մասնագիտական վարժարանների վերաբացմանը զուգընթաց, դասընթացներ են սկսվել տեխնիկական ֆրանսերենի դասավանդման բնագավառում:
Ֆրանկոֆոնիայի միամսյակի (14/03- 21/04) նախօրեին GREF-ի պատվիրակության ժամանումը եւս մեկ անգամ վկայում է Հայաստանի դպրոցներում ֆրանսերենի դասավանդման պահպանմանը եւ զարգացմանն ուղղված միջոցառումների կարեւորության մասին:
Ժողովից հետո՝ մարտի 7-ին, ժամը 12-ին, ծրագրի ղեկավար Գի Բոնոմը ավելի մանրամասն կներկայացնի GREF-ի գործունեությունը:
