Լիբանանը պնդում է, որ Իսրայելի հետ ծովային սահմանի դեմարկացիան պետք է իրականացվի գրավոր տեսքով: Այս մասին հայտարարել է Լիբանանի խորհրդարանի խոսնակ Նաբի Բերրին, հաղորդում է Reuters-ը:

ԱՄՆ ներկայացուցիչ Դեւիդ Սաթթերֆիլդն այցելել է Լիբանան եւ Իսրայել, փորձել բանակցություններ սկսել երկու երկրների միջեւ, որոնք մնում են պատերազմական վիճակում 1948թ. Իսրայելի հիմնադրման պահից:

Ծովային վեճի կարգավորումը կարող է երկու կողմերին օգնել օգտագործել էներգիայի ծովային պաշարները: Իսրայելի էներգետիկայի նախարար Յուվալ Շտայնտիզը հայտարարել է, որ այս ամիս ԱՄՆ միջնորդությամբ բանակցությունների սկիզբ է ակնկալում:

Սակայն Լիբանանի խորհրդարանի խոսնակ Նաբի Բերին այսօր հայտարարել է, որ դեռ պետք է 2 հարց լուծել. առաջին հարցը կապված է ծովային եւ ցամաքային սահմանների հետ, երկրորդը՝ գրավոր տեսքով համաձայնության հետ: