Լիբիայի առաջնորդ Մուամար Քադաֆին բարձրացրել է իրեն հավատարիմ ոստիկանության աշխատակիցների եւ զինվորականների կոչումները:

«Հեղափոխության առաջնորդը որոշել է բարձրացնել խաչակիրների եւ գաղութարարների դեմ հերոսական պայքարի առաջամարտիկների կոչումները», -նշվում է հաղորդագրության մեջ:  Առայժմ սակայն չի հաղորդվում, արդյոք Քադաֆիի կողմից կոչման բարձրացումը ենթադրում է նաեւ գումարային  ավելացումներ, գրում է  Lenta.ru-ն:

Իր հերթին ամերիկյան հրամանատարության բարձրաստիճան ներկայացուցիչներից շտաբերի պետերի միացյալ կոմիտեի ղեկավար, փոխծովակալ Ուիլյամ Գորտնին մարտի 25-ին հայտարարել էր, թե իր ունեցած տեղեկություններով Քադաֆին «զինում է կամավորների ընդդիմության դեմ պայքարելու համար»: «Ես վստահ չեմ, որ նրանք իրականում կամավորներ են եւ չգիտեմ, թե քանի մարդու է հաջողվել ներգրավել: Սակայն  նրա կողմից քաղաքացիական բնակչությանը  դիմելու փաստը հետաքրքրական եմ համարում », - հայատարարել էր նա:

Գորտնին նաեւ նշել էր, որ միջազգային կոալիցիայի կողմից  մարտի 19-ին սկսված օպերացիայի արդյունքում Քադաֆիին հավատարիմ ուժերին նշանակալի վնաս է հասցվել: «Նրա ռազմական օդանավերն այլեւս չեն թռչում, նավերը կանգնած են նավահանգստում,  հրամանատարային կետերն ու բունկերներն այլեւս պիտանի չեն օգտագործման համար», - հայտարարել է փոխծովակալը: