նախընտրելի դարձնել
Երեւանում այսօր` ապրիլի 7-ին կազմակերպված «Կանայք տեղական ինքնակառավարման համակարգում» թեմայով քննարկմամբ մեկնարկել են Հայաստանում տեղական ինքնակառավարման համակարգի ներդրման 15-ամյակին նվիրված հոբելյանական միջոցառումները:
Քննարկմանը բարձրացվել են հասարակական-քաղաքական կյանքում կնոջ մասնակցության, կանանց եւ տղամարդկանց հավասար իրավունքների ու հավասար հնարավորությունների ապահովման խնդիրները, ներկայացվել են գենդերային խտրականության վերացմանն ուղղված ՀՀ կառավարության քայլերը: Մասնավորապես` նշվել է, որ ՀՀ վարչապետին կից կանանց հարցերով խորհրդի վերջին նիստում քննարկվել են «ՀՀ գենդերային քաղաքականության 2011-2015 թթ» ռազմավարական ծրագիրը եւ «ՀՀ գենդերային քաղաքականության 2011 թ. միջոցառումների տարեկան ծրագրի» նախագիծը, ինչպես նաեւ «Կանանց եւ տղամարդկանց հավասար իրավունքների եւ հավասար հնարավորությունների ապահովման մասին» օրենքի նախագիծը, որով առաջարկվում է մեծացնել կանանց ներգրավվածությունը նաեւ ՏԻՄ համակարգում, որտեղ ներկայումս կանանց ներկայացվածությունը 2-2,5 տոկոս է:
Նշենք, որ կատարված հետազոտության արդյունքներով պարզվել է, որ հասարակության լայն շրջանակներում կանայք դեռեւս չեն ընկալվում ղեկավար բարձր պաշտոններում, ինչը հիմնական խոչընդոտներից է համարվում: Ըստ հետազոտության` գյուղական համայնքներում կանայք ավելի քիչ են առաջադրվում, քան քաղաքային համայնքներում, մինչդեռ գյուղական համայքներում նրանց հաջողության գործակիցն ավելի բարձր է:
