Երեւանի քաղաքապետարանը ապրիլի 9-ը  եւ 16-ը հայտարարում է  համաքաղաքային ծառատունկի եւ բարի ավանդույթ դարձած շաբաթօրյակի օրեր, որի կապակցությամբ քաղաքապետ Կարեն Կարապետյանը դիմել է երեւանցիներին:

«Մաքուր, բարեկարգ ու կանաչ քաղաք ունենալը բոլորիս ցանկությունն է եւ, միաժամանակ, բոլորիս պարտականությունը:

Մենք միասին գործով կարող ենք ցույց տալ մեր սերն ու հարգանքը քաղաքի հանդեպ: Վստահ եմ, ում հարազատ է Երեւանը, կմիանա մեզ:

Քաղաքային միջավայրը պետք է առանձնանա իր մաքրությամբ  ու  կանաչապատման մշակույթով: Այստեղ յուրաքանչյուրիս լուման կարեւոր է:

Քաղաքը, մեր շրջակայքը մաքրելու, միասնական ծառատունկին մասնակցելու համար, վստահ եմ, հազարավոր երեւանցիներ են արձագանքելու:

Հորդորում եմ բոլոր տնտեսվարող սուբյեկտներին, բանկերին, խանութներին,  ավտովառելիքի կայաններ շահագործողներին, մասնավոր տների հատվածին,  նաեւ միջազգային  կաույցներին ` մաքրել ու կանաչապատել իրենց հարակից տարածքները: Խնամված ու բարեկարգ վիճակը մեզանից յուրաքանչյուրի եւ ընդհանրապես  քաղաքի դեմքն է:  

Կոչ եմ անում բոլոր երեւանաբնակներին` մասնակցել այս համաքաղաքային միջոցառմանը. ծառատունկը դարձնենք տոն ու այդ  տոնը նվիրենք մեր քաղաքին»,- ասված է Կարեն Կարապետյանի խոսքում: