Արմավիրի մարզի բնակիչ Հովհաննես Եղիազարյանի հարազատները բաց նամակով դիմել են Հայաստանի նախագահ Սերժ Սարգսյանին` խնդրելով քրեական պատասխանատվության ենթարկել «Շանթ Էլիտ» գործարանի սեփականատեր Վարշամ (Յուրա) Ղարիբյանին:

Նամակում, մասնավորապես ասված է.

«Հարգարժան պարոն Սարգսյան.

Դեռեւս 2008թ.սեպտեմբերի 23-ին ՀՀ Արմավիրի մարզի Մրգաստան գյուղի  բնակիչ Հովհաննես Եղիազարյանին  անմիջապես իր հայրական տան դիմացից առեւանգել, Երեւանում գործող «Էլիտ Շանթ»  գործարան է տեղափոխել  ու դաժան ծեծի ենթարկել  բազում հանցագործություններ կատարած եւ անպատիժ մնացած Վարշամ (Յուրա) Ղարիբյանը: Այս գործողությունների նպատակն է  եղել ստիպել  Հ. Եղիազարյանին  ստացականներ գրել այն մասին, թե իբր  վերջինս  պարտքով խոշոր  գումար է վերցրել  Վ. Ղարիբյանից: Ստացականները ստիպողաբար գրելուց հետո  Վ. Ղարիբյանը վերցրել է  Հ. Եղիազարյանի  գրպանում եղած 120 հազար  դրամը, որից միայն 5 հազար դրամն է  վերադարձրել`տաքսիով  տուն հասնելու համար: Հ. Եղիազարյանի ավտոմեքենան  եւս Վ. Ղարիբյանը  պահել է  գործարանի տարածքում:

Ծեծի հետեւանքով Հ. Եղիազարյանը ստացել  է տարբեր աստիճանի մարմնական  վնասվածքներ,  այդ թվում`  գլխուղեղի ցնցում,  քթոսկրի կոտրվածք եւ մինչեւ 2008 թ.  հոկտեմբերի վերջերը  բուժում է ստացել տարբեր բուժհաստատություններում:

Դեպքի առթիվ  2008թ. սեպտեմբերի 29-ին ՀՀ ոստիկանության Վաղարշապատի  քննչական բաժանմունքում  ՀՀ քրեական օրենսգրքի  131-րդ  հադվածի 2-րդ մասի 1-ին կետի  հատկանիշներով  հարուցվել է քրեական գործ` Հ. Եղիազարյանին առեւանգելու փաստի  առթիվ: 

Միայն 2009թ. փետրվարի 13-ին է Վարշամ Ղարիբյանին մեղադրանք առաջադրվել, այն էլ ՀՀ քրեական օրենսգրքի 117-րդ հոդվածով` Հ. Եղիազարյանին թեթեւ վնաս պատճառելու կապակցությամբ:

Ակնհայտ թերի,  միակողմանի քննություն կատարելուց հետո , նախաքննական մարմինը 3 անգամ որոշումներ է կայացրել  քրեական գործի  վարույթը կարճելու  եւ Վարշամ Ղարիբյանի  նկատմամբ  քրեական հետապնդումը  դադարեցնելու մասին:

Կատարվածն այն աստիճան զարհուրելի է եղել, որ  ՀՀ Արմավիրի մարզի  ընդհանուր իրավասության  դատարանը երեք անգամ  շարունակ  վերացրել է քրեական  գործի վարույթը  կարճելու  եւ  քրեական հետապնդումը դադարեցնելու  մասին որոշումները եւ  կարճված քրեական գործի  վարույթը վերսկսվել է:

Անգամ այս աստիճան միակողմանի  նախաքննությամբ  ձեռք բերված  ապացույցներն անգամ  հիմնավորում են  Վարշամ Ղարիբյանի կողմից  կատարված հանցագործությունների փաստը թույլ է  տալիս օրենքով  սահմանված կարգով Վ. Ղարիբյանին ենթարկել  քրեական  պատասխանատվության:

Քննչական մարմնի  եւ նրա նկատմամբ  հսկողություն իրականացնող  դատախազության նման պահվածքն ունի  իր պատճառները:   Քրեական գործի շարունակաբար  ապօրինի  կարճումներն ուղղակի կապվում են  ՀՀ գլխավոր դատախազ Ա. Հովսեփյանի անվան հետ:  Գաղտնի չէ, ու մամուլում էլ բազմաթիվ  հրապարակումներ են եղել այն մասին, որ Վ. Ղարիբյանը  գտնվում է  ՀՀ գլխավոր դատախազի  անձնական հովանավորության ներքո:  Հենց դա է պատճառը, որ  Վ. Ղարիբյանը գնացել է նման լկտի  ու սանձարձակ քայլի, համոզված լինելով, որ  Աղվան Հովսեփյանի հովանավորությամբ  խուսափելու է  պատասխանատվությունից եւ անպատժելիությունը  Վ. Ղարիբյանին դրդում է  նորանոր հանցագործություններ կատարելու: Միայն այս երկու տարիների ընթացքում Վ.Ղարիբյանը  կատարել է բազմաթիվ հանցագործություններ  ու դրանց  վերաբերյալ հարուցված քրեական գործերը  միմյանց հաջորդելով կարճվել են:

Ի վերջո Վ. Ղարիբյանի «ուժեղ մեջքն» իր գործը  կատարել է  եւ 2010թ. սեպտեմբերի 17-ին քննիչի կողմից (որի եղբայրն ի դեպ  նույնպես աշխատում է  Վ.Ղարիբյանի մոտ  որպես առաքիչ)  կայացվել են Վ. Ղարիբյանի նկատմամբ  քրեական հետապնդումը  դադարեցնելու  եւ քրեական գործի վարույթը  կասեցնելու մասին որոշումներ:

Այս մասին Արմավիրի մարզի  ընդհանուր իրավասության դատարանն  իր  մեջ ուժ չի գտել  վերացնելու  այդ որոշումներն  ու այդ որոշումների դեմ ներկայացված  բողոքները մերժել է: Այժմ  կայացված որոշումները  Հ. Եղիազարյանի կողմից  բողոքարկվել են  ՀՀ Վճռաբեկ դատարան  եւ մենք բոլորս  սպասում ենք  այդ դատարանի որոշմանը:

Չենք ցանկանում հավատալ, որ Վ.Ղարիբյանին հովանավորողն  այնքան զորեղ  է, որ Վ. Ղարիբյանը  կարողանալու է  հերթական անգամ խուսափել  կատարվածի համար արժանի, օրենքով սահմանված  պատասխանատվությունից:

Ավելին` անպատասխանատվությունից թեւավորված  Վ. Ղարիբյանը, օգտագործելով  առեւանգման  ու ծեծի հետեւանքով ստիպողաբար գրված ստացականները, քաղաքացիական հայց է հարուցել Հ. Եղիազարյանի  դեմ եւ հիմա  էլ ցանկանում  է նրա  ձեռքից խլել հայրական տունը` ընտանիքը թողնելով փողոցում:

Հագելի պարոն նախագահ, սա է պատճառը, որ ճարահատյալ դիմում ենք  Ձեզ` հայցելով Ձեր  միջամտությունը Հ. Եղիազարյանին առեւանգելու եւ ծեծի ենթարկելու  փաստի առթիվ  հարուցված քրեական գործը վերսկսելու եւ օրինական ընթացք ապահովելու հարցում:

Ս.թ փետրվարի 28-ին մենք` Հ. Եղիազարյանի  հարազատներս ու համագյուղացիներս այցելել էինք  նախագահի  նստավայր ու Ձեզ հասցեագրված   դիմում հանձնել, որում  առավել մանրամասն  ներկայացված էր  կատարվածը: Ի զարմանս մեզ, սակայն, հաշված օրեր անց  տեղեկացանք, որ Հ. Եղիազարյանի դիմումն ուղարկվել է ՀՀ  գլխավոր դատախազություն: Փաստորեն ստացվում է, որ  դիմումը բարձրացված հարցերի պետք է պատասխանի Վ. Ղարիբյանին հովանավորողի կողմից  ղեկավարվող  հիմնարկը:

Համոզված ենք, որ դիմումի  բովանդակությունը Ձեզ պատշաճ կարգով չի զեկուցվել, այլապես չէր  վերահացեագրվի ՀՀ գլխավոր դատախազություն: Սա է պատճառը, որ ստիպված ենք Ձեզ  դիմել  բաց  նամակի ձեւով, հավատալով, որ  կատարվածի մասին տեղեկանալով թույլ չէք տա, որ օրինազանցն օգտվի պետական պաշտոնյայի հովանավորությունից եւ խուսափի պատասխանատվությունից:

Հարգելի պարոն նախագահ  խնդրում ենք Ձեր հանձնարարությունը պատշաճ մարմիններին  օբիեկտիվ եւ բազմակողմանի  քննություն կատարելու եւ  հանցագործություն կատարած Վ. Ղարիբյանին  պատժելու համար»: