նախընտրելի դարձնելՀայաստանի տարածքային կառավարման նախարարությունում այսօր` հունիսի 9-ին տեղի է ունեցել Արմավիրի մարզում դժվարին պայմաններում հայտնված երեխաների հիմնախնդիրներին նվիրված քննարկում:
Օրերս Ծաղկաձորում փոխվարչապետ Արմեն Գեւորգյանի եւ այս խոցելի խմբի հիմնախնդիրներով զբաղվող «Երեխաների պաշտպանության ցանցի» անդամ ՀԿ-ների ներկայացուցիչների հետ հանդիպմանը պայմանավորվածություն էր ձեռք բերվել առկա խնդիրներին ծանոթանալու, դրանց լուծման հնարավորությունները քննարկելու համար ըստ մարզերի հանդիպումներ կազմակերպել:
«Ուժերը համախմբելու, աշխատանքները ճիշտ բաշխելու եւ կազմակերպելու դեպքում հնարավոր կլինի ավելի մեծ արդյունքների հասնել»,-խնդրին անդրադառնալով ասել է փոխվարչապետ Արմեն Գեւորգյանը` կարեւորելով շահագրգիռ բոլոր կողմերի` մարզպետարանի, համայնքապետերի, հասարակական կազմակերպությունների, ընկերությունների համագործակցված աշխատանքը:
ՏԿՆ մամուլի ծառայությունից NEWS.am-ին հայտնում են, որ մարզում գործունեություն ծավալող ՀԿ-ները հիմնականում բարձրացրել են համայնքներում սոցիալական տների, զարգացման կենտրոնների ստեղծման խնդիրը, որոնց միջոցով հնարավոր կլինի կազմակերպել խոցելի խմբում հայտնված երեխաների ուսուցումը, ժամանցը:
Կարեւորվել է համայնքներում նաեւ սոցիալական աշխատողի առկայությունը, ով կայցելի ընտանիքներ, անձամբ կաշխատի նրանց հետ: Այս նպատակների համար բարձրացվել է համայնքային բյուջեներում որոշակի գումարների նախատեսման հարցը: Նշվել է կամավորության ինստիտուտը զարգացնելու անհրաժեշտության մասին: Քննարկվեցին ծայրահեղ վատ պայմաններում գտնվող ընտանիքների բնակարանային պայմանների բարելավման հնարավորությունները:
«Բարձրացված խնդիրներն առաջնային են եւ լինելու են կառավարության ուշադրության կենտրոնում», նշել է փոխվարչապետը:
