նախընտրելի դարձնելՀայաստանի գլխավոր հարկադիր կատարող Միհրան Պողոսյանի գլխավորած պատվիրակությունը երկօրյա աշխատանքային այցով ժամանել է ԼՂՀ, որտեղ տեղի է ունեցել Հայաստանի եւ ԼՂՀ ԴԱՀԿ ծառայությունների համատեղ աշխատանքային խորհրդակցությունը:
ԴԱՀԿ մամուլի ծառայությունից NEWS.am-ին հայտնում են, որ խորհրդակցության ընթացքում, մասնավորապես, անդրադարձ է եղել ներդրված տեղեկատվական տեխնոլոգիաների կիրառմամբ աշխատանքների արդյունավետության բարձրացմանը, փոխադարձ խորհրդատվության տրամադրմանը, համատեղ միջոցառումների կազմակերպմանը եւ իրավական փոխհարաբերությունների ամրապնդման համատեքստում կարեւորվել է երկու ծառայությունների ղեկավարների միջեւ հունիսի 29-ին «Փոխադարձ իրավական օգնության մասին» հուշագրի ստորագրումը:
Ներկայացվել է, որ վերոնշյալ համաձայնագրի ստորագրմամբ կողմերին այսուհետ հնարավորություն կընձեռվի ցուցաբերել փոխադարձ իրավական օգնություն եւ հարուցված կատարողական վարույթների մասին տրամադրել անհրաժեշտ տեղեկատվություն:
Այնուհետեւ ՀՀ գլխավոր հարկադիր կատարող Միհրան Պողոսյանի գլխավորած պատվիրակությունը Մարտակերտում մասնակցել է քաղաքի ազատագրման օրվան նվիրված հանդիսավոր միջոցառմանը:
