նախընտրելի դարձնելՀայաստանի արդարադատության նախարարությունն արձագանքել է իր աշխատակից, փոխգնդապետ Արտակ Ղազարյանի եւ ոստիկանների միջեւ տեղի ունեցած միջադեպին:
Արդարադատության նախարարության մամուլի ծառայությունից ուղարկված հաղորդագրության մեջ նշվում է հետեւյալը.
«Տեղի է ունեցել տհաճ միջադեպ մեր աշխատակցի եւ ոստիկանության ծառայողների միջեւ: Ընթանում է քննություն:
Հայաստանի արդարադատության նախարարության որդեգրած սկզբունքի համաձայն՝ օրենքի առջեւ հավասար են բոլոր քաղաքացիները՝ այդ թվում նաեւ արդարադատության նախարարության աշխատողները: Սկզբունք, որն ամրագրված է ՀՀ Սահամանադրությունում:
Նույն նկատառումներով նախարարությունը չի պատրաստվում միջամտել քննությանը կամ մեկնաբանել գործընթացները:
Միեւնույն ժամանակ, արդարադատության նախարարությունը անհրաժեշտ քայլեր կձեռնարկի, որպեսզի իրականացվի բազմակողմանի եւ օբյեկտիվ քննություն»:
Նշենք, որ տեղի ունեցած միջադեպը բավական լուրջ է, հատկապես, որ NEWS.am-ի տեղեկություններով, ոստիկանության աշխատակիցները ծեծի են ենթարկել արդարադատության նախարարության քաղաքացիական կացության ակտերի գրանցման եւ մեթոդոլոգիայի բաժնի պետ, արդարադատության փոխգնդապետ 36-ամյա Արտակ Ղազարյանին, ով լուրջ մարմնական վնասվածքներ է ստացել:
