նախընտրելի դարձնել
Այսուհետ կարգելվի առանց համապատասխան թույլտվության կառուցված շենքերի օրինականացման գործընթացը։ Այս մասին Ազգային ժողովի արտահերթ նիստում Քաղաքացիական օրենսգրքում փոփոխություններ եւ լրացումներ կատարելու եւ հարակից օրենքներում փոփոխություններ կատարելու մասին օրինագծերի փաթեթի քննարկման ժամանակ ասաց արդարադատության փոխնախարար Երանուհի Թումանյանցը։
Նրա խոսքով, բոլոր ապօրինի շինությունները ենթակա են քանդման։ Ներկայացնելով փոփոխությունները՝ փոխնախարարը, մասնավորապես, նշեց, որ նոր կարգավորումը չի ազդի այն ապօրինի շինությունների վրա, որոնք կառուցվել են մինչեւ սույն կարգավորման ուժի մեջ մտնելը։ Այսպիսով, այս կատեգորիայի հետ կապված խնդիրները կլուծվեն շինարարության պահին գործող կարգավորումների համաձայն:
«Գոյություն ունեցող շենքերը հետագայում օրինականացնելու համար դրանք պետք է հաշվառվեն Անշարժ գույքի կադաստրի ազգային կոմիտեում։ Այստեղ երկու ռեժիմ է գործում։ Առաջինը վերաբերում է 2021 թվականի հունվարի 1-ից հետո կառուցված շենքերին, երկրորդը՝ մինչեւ նշված ժամկետը։ Երկրորդ դեպքում արդեն երեք ռեժիմ է գործում։ Երեւանի դեպքում ապօրինի շինությունները կադաստրում պետք է հաշվառվեն մինչեւ 2023 թվականի հունվարի 1-ը, այլ քաղաքների դեպքում՝ մինչեւ 2024 թվականի հունվարի 1-ը, իսկ գյուղերի դեպքում՝ մինչեւ 2025 թվականի հունվարի 1-ը»,- պարզաբանեց Թումանյանցը։
Ինչ վերաբերում է 2021 թվականի հունվարի 1-ից հետո կառուցված շենքերին, ապա կարգի մասին որոշումը կհաստատի հանրապետության կառավարությունը։ Այնուհետեւ իշխանությունները երկու ամիս ժամանակ կտան ապօրինի շինությունների նշված կատեգորիան հաշվառման դնելու համար։ Միաժամանակ կառավարության որոշումը կընդունվի նոր կարգավորումն ուժի մեջ մտնելուց հետո երկամսյա ժամկետում։
