նախընտրելի դարձնելՀայ ազգային կոնգրեսը զերծ է մնում մեկնաբանել իշխող կուսակցության նոր հայտարարությունից, որով նա կոնկրետացնում է ՀԱԿ-ի հետ խորհրդակցությունների առաջին փուլի անցկացման վայրն ու ամսաթիվը։
Ինչպես NEWS.am-ի թղթակցին ասաց ՀԱԿ մամուլի քարտուղար Արման Մուսինյանը, պատասխանն ավելի ուշ կլինի։ Ի դեպ, ՀԱԿ-ը մինչ այժմ ընդհանրապես չի արձագանքել իշխանությունների՝ ընդդիմության հետ խորհրդակցություններ անցկացնելու համար աշխատանքային խմբի ստեղծմանը։ Մուսինյանն ավելի վաղ հայտարարել էր, որ ՀԱԿ-ի պատասխանը կհետեւի այս առումով նախագահի պաշտոնական հրահանգից անմիջապես հետո։
Նշենք, որ Հայաստանի կառավարող կոալիցիան ընդդիմադիր Հայ ազգային կոնգրեսին հրավիրել է հանդիպման: Հայաստանի Ազգային Ժողովի նախագահ Հովիկ Աբրահամյանը հայտարարություն է տարածել, որում ասված է. «Քաղաքական կոալիցիայի անունից լիազորված եմ հայտարարելու, որ կոալիցիոն կուսակցությունների կողմից ձեւավորված աշխատանքային խումբը` Դավիթ Հարությունյանի (ՀՀԿ), Գագիկ Մինասյանի (ՀՀԿ), Նաիրա Զոհրաբյանի (ԲՀԿ), Վարդան Բոստանջյանի (ԲՀԿ), Մհեր Շահգելդյանի (Օրինաց երկիր) եւ Խաչիկ Հարությունյանի (Օրինաց երկիր) մասնակցությամբ, պատրաստ է սկսելու քննարկումների շարքը ՀԱԿ համապատասխան հանձնախմբի հետ»:
Աշխատանքային խմբի անդամները հրավիրում են Հայ ազգային կոնգրեսը ներկայացնող իրենց գործընկերներին հուլիսի 18-ին` ժամը 16-ին Հանրային խորհրդի փոքր նիստերի սրահ` առաջին հանդիպման համար:
