նախընտրելի դարձնել
Գերմանիան եւ Հնդկաստանը ստորագրել են կայուն զարգացմանը նվիրված մի շարք երկկողմ համաձայնագրեր, որոնց համաձայն հարավասիական երկիրը կստանա 10 միլիարդ եվրո օգնություն՝ մինչեւ 2030 թվականը մաքուր էներգիայի օգտագործումը խթանելու համար, հայտնում է AP-ն:
Համաձայնագրերը ստորագրվել են Բեռլին Հնդկաստանի վարչապետ Նարենդրա Մոդիի այցի ժամանակ։ Գերմանիայի կանցլեր Օլաֆ Շոլցը Հնդկաստանի աջակցությունն է փնտրում ուկրաինական պատերազմի հարցում Ռուսաստանի նկատմամբ Եվրոպայի եւ Միացյալ Նահանգների կոշտ դիրքորոշման հարցում:
Մոդին կրկնել է ռազմական գործողությունները դադարեցնելու Ռուսաստանին եւ Ուկրաինային ուղղված իր կոչը՝ ասելով. «Մենք կարծում ենք, որ կողմերից ոչ մեկը չի կարող հաղթող դուրս գալ այս պատերազմում»:
Համաձայնագրերը ներառում են ամենատարբեր հարցեր՝ սկսած վերականգնվող էներգիայի եւ ջրածնի օգտագործման ընդլայնման համար տեխնիկական աջակցությունից մինչեւ ջերմոցային գազերի արտանետումների կրճատում, կենսաբազմազանության պաշտպանություն եւ գյուղատնտեսական հողերի օգտագործման բարելավում: Համագործակցության մյուս ոլորտները կենտրոնացած են միգրացիայի, միջուկային հետազոտությունների եւ երկու կառավարությունների միջեւ հաղորդակցության ապահով ուղիների ստեղծման վրա։
Շոլցը նաեւ հրավիրել է Հնդկաստանին, Ինդոնեզիային, Սենեգալին եւ Հարավային Աֆրիկային՝ մասնակցելու հունիսի վերջին Գերմանիայում կայանալիք G7-ի հանդիպմանը:
