նախընտրելի դարձնել
Առնվազն հինգ մարդ է զոհվել եւ մոտ 50-ը վիրավորվել Կոնգոյի արեւելքում Գոմա քաղաքում ՄԱԿ-ի առաքելության դեմ ցույցերի երկրորդ օրը, հայտնում է AP-ն՝ վկայակոչելով կառավարության ներկայացուցիչ Պատրիկ Մույայային։
Երկուշաբթի օրը ցուցարարները հրկիզումներ են կատարել եւ ներխուժել են Գոմայում ՄԱԿ-ի առաքելության գրասենյակներ՝ մեղադրելով խաղաղապահ ուժերին Կոնգոյի արեւելյան շրջանում աճող բռնությունների ֆոնին խաղաղ բնակչությանը պաշտպանելու ձախողման մեջ: Նրանք պահանջել են, որ ՄԱԿ-ի ուժերը, որոնք տարիներ շարունակ ներկա են եղել Կոնգոյում, հեռանան։
Ցուցարարները մարդկանց մահվան համար մեղադրել են կրակ բացած խաղաղապահներին։
Կառավարության ներկայացուցիչը չի ասել, թե ինչն է եղել մարդկանց մահվան պատճառը, սակայն անվտանգության ուժերի եւ խաղաղապահների արձագանքը բնութագրել է որպես «նախազգուշական կրակոցներ՝ ցուցարարներին ցրելու եւ բազայի եւ օբյեկտների վրա ցանկացած հարձակում կանխելու համար»:
2021 թվականի հունիսին եւ 2022 թվականի հունիսին խաղաղապահ առաքելությունը, որը հայտնի է ֆրանսիական MONUSCO հապավումով, փակել է իր գրասենյակները Կոնգոյի կենտրոնական Կասաի եւ Տանգանիկա շրջաններում։ Ըստ ՄԱԿ-ի, առաքելությունը Կոնգոյում ունի ավելի քան 16 000 զինծառայող:
Բողոքի ցույցերը տեղի են ունենում Կոնգոյի զորքերի եւ M23-ի ապստամբների միջեւ սրվող մարտերի ֆոնին, որոնք ստիպել են մոտ 200 000 մարդկանց լքել իրենց տները: Ըստ Human Rights Watch-ի զեկույցի, M23-ի ուժերը կրակային հզորություն եւ պաշտպանունակություն են դրսեւորել:
Արեւելյան Կոնգոն տուն է բազմաթիվ ապստամբ խմբերի համար, եւ տարածաշրջանի անվտանգությունը վատթարացել է՝ չնայած Կոնգոյի եւ Ուգանդայի բանակների միացյալ ուժերի կողմից մեկ տարվա արտակարգ գործողություններին: Երկրի արեւելքում գտնվող խաղաղ բնակիչները նույնպես ստիպված են բախվել «Իսլամական պետություն» խմբավորման հետ կապված ջիհադիստ ապստամբների կողմից բռնություններին:
