Իտալիայի նախկին վարչապետ, այժմ պատգամավոր Սիլվիո Բեռլուսկոնին հայտարարել է, որ Ուկրաինայի նախագահ Վլադիմիր Զելենսկին Ռուսաստանի առաջնորդ Վլադիմիր Պուտինին մղեց անվերջ պատերազմի, ասվում է ձայնագրության մեջ, որը ձեռք է բերել իտալական լրատվամիջոցը, հայտնում է Bloomberg-ը։

LaPresse-ի հրապարակած աուդիոձայնագրության մեջ 86-ամյա Բեռլուսկոնին ասում է, որ Պուտինը չէր ուզում պատերազմի գնալ, բայց ստիպված էր դա անել Դոնբասի վրա Ուկրաինայի շարունակական հարձակումների պատճառով:

Ընտրվելուց հետո Զելենսկին, Բեռլուսկոնիի խոսքով, «եռապատկեց գրոհները», եւ Պուտինը միջամտեց, որպեսզի փոխարինի նրան «ուկրաինական փոքրամասնության, ազնիվ, ողջամիտ մարդկանց կողմից ձեւավորված» կառավարությամբ: «Նա բախվեց մի իրավիճակի, որը չէր կարող կանխատեսել՝ ուկրաինացիների դիմադրությանը, որոնք երրորդ օրը սկսեցին փող եւ զենք ստանալ Արեւմուտքից»,- ասել է Բեռլուսկոնին: «Այսպիսով, երկշաբաթյա գործողության փոխարեն այս պատերազմը վերածվեց 200-ամյա պատերազմի»։