Սպիտակ տան էներգետիկայի հարցերով խորհրդական Ամոս Հոխշտեյնը «ոչ ամերիկյան» է որակել երկրի թերթաքարային նավթի ներդրողների՝ հորատման ծավալներն ավելացնելու մերժումը:

«Կարծում եմ, որ այն գաղափարը, որ ֆինանսիստները ԱՄՆ-ում ընկերություններին ասում են չավելացնել արտադրությունը, այլ մեծացնել շահաբաժինները, երբ շահույթը գտնվում է պատմության ամենաբարձր մակարդակի վրա, սարսափելի է: Սա ոչ միայն ոչ ամերիկյան է, այլեւ անարդար է ամերիկյան հանրության նկատմամբ», - Financial Times-ին ասել է խորհրդականը:

Հոխշտեյնը քննադատել է նաեւ Exxon Mobil Corp-ի վերջերս հայտարարված բաժնետոմսերի հետգնման սխեման:

Exxon-ը այս շաբաթ հայտարարել էր բաժնետոմսերի հետգնման մասին եւ բարձրացրել իր ավագ ղեկավարության եւ այլ ղեկավարների տարեկան բազային աշխատավարձը հաջորդ տարվա համար:

Ընկերությունն ավելի շատ կանխիկ գումար է տալիս բաժնետերերին, քան ներդրումներ է կատարում նոր արտադրության մեջ: Այնուամենայնիվ, ընկերությունը մինչեւ 2027 թվականը անփոփոխ է պահել տարեկան 20-ից 25 միլիարդ դոլար կապիտալիզացիայի շրջանակը:

Նավթային արդյունաբերության այս տարվա մեծ շահույթը գրավել է ԱՄՆ նախագահ Ջո Բայդենի ուշադրությունը, ով մեղադրել է ոլորտի ներկայացուցիչներին՝ պատերազմից շահույթ ստանալու համար եւ ասել, որ Exxon-ը «ավելի շատ փող է աշխատում, քան Աստված»:

Բայդենը ամերիկյան նավթագազային ընկերություններին բազմիցս հորդորել է օգտագործել իրենց ռեկորդային շահույթը՝ արդյունահանումն ավելացնելու եւ ամերիկացիների համար վառելիքի գներն իջեցնելու համար:

Հոխշտեյնի մեկնաբանությունները հնչել են G7-ի կողմից ռուսական օֆշորային նավթի գների վերին շեմի հայտարարման ֆոնին, սակայն Ռուսաստանը հայտարարել է, որ չի ենթարկվի իրավիճակին, նույնիսկ եթե ստիպված լինի կրճատել արդյունահանումը: