Եգիպտոսի նախկին նախագահ Հոսնի Մուբարաքի դատավարությունը հետաձգվել է մինչեւ սեպտեմբերի 15-ը: Եգիպտական դատարանը սեպտեմբերի 7-ին վերսկսել էր նրա նկատմամբ հարուցված գործի քննությունը:

Մուբարաքին, ով մեղադրվում է հակակառավարական հուզումների մասնակիցներին գնդակահարելու մեջ, Կահիրեի դատարան են բերել պատգարակով:

Սեպտեմբերի 5-ին դատարանում որպես վկա հարցաքննվել է ոստիկանության հատուկ ստորաբաժանման պետ, գեներալ Հուսեյն Մուսսան: Նա հայտարարել է, որ ոստիկանությունը այս տարվա փետրվարից ցուցարարներին ցրելու ժամանակ զենք է կիրառել միայն ինքնապաշտպանության նպատակներով եւ ռազմական փամփուշտեր կիրառելու հրաման չի ստացել:

Ինչպես արդեն հայտնել է NEWS.am-ը, սեպտեմբերի 5-ին դադարեցվել էին լսումները Եգիպտոսի նախկին նախագահ Հոսնի Մուբարաքի գործով: Նախկին նախագահի պաշտպանի եւ հանրության շահերը ներկայացնող փաստաբանի ծեծկռտուքը դադարեցրել է դատաքննությունը:

Դատապարտյալի աթոռին են նաեւ Մուբարաքի երկու որդիները՝ Գամալը եւ Ալաան, ՆԳ նախկին նախարար Հաբիբ ալ-Ադիլը եւ ոստիկանության 6 բարձրաստիճան նախկին աշխատակիցներ:

Մուբարաքը մեղադրվում է հակակառավարական ցույցերի մասնակիցների զանգվածային սպանություններին մասնակից լինելու, ինչպես նաեւ՝ կոռուպցիայի մեջ։ Մեղադրական  դատավճռի կայացման դեպքում Մուբարաքին մահապատիժ է սպառնում։

Նա իրեն ներկայացված բոլոր մեղադրանքները հերքում է։

Մուբարաքի որդիները մեղադրվում են կոռուպցիայի մեջ, նրանք եւս հերքում են իրենց մեղքը։