նախընտրելի դարձնել«Հաբիթաթ ֆոր Հյումենիթի» կազմակերպությունը կշարունակի ծրագրերի իրականացումը Հայաստանում:
Հայաստանի փոխվարչապետ, տարածքային կառավարման նախարար Արմեն Գեւորգյանն այսօր` սեպտեմբերի 19-ին, ընդունել է «Հաբիթաթ ֆոր Հյումենիթի» կազմակերպության պատվիրակությանը` տնօրենների խորհրդի նախագահ Քեն Քլեյի ղեկավարությամբ:
ՏԿՆ մամուլի ծառայությունից NEWS.am-ին հայտնում են, որ Ա. Գեւորգյանը նշել է, որ Հայաստանի` որպես երիտասարդ պետության խնդիրներից է նաեւ քաղաքացիների բնակարանային պայմանների բարելավումը:
Փոխվարչապետի խոսքով` նորանկախ հանրապետությունում բնակարանի կարիք ունեցող քաղաքացիները մեծ թիվ էին կազմում. դրանք թե Սպիտակի ավերիչ երկրաշարժի հետեւանքով տուժածներն էին, թե Արցախյան ազատամարտի տարիներին սահմանամերձ բնակավայրերի բնակիչները, թե փախստականները: Վերջին տարիներին կառավարությունն իր հնարավորությունների սահմաններում փորձել է խնդրին լուծում տալ, իրականացվել են մի շարք ծրագրեր աղետի գոտում, փախստականների համար: «Մենք երախտապարտ ենք բոլոր կազմակերպություններին, որոնք աջակից են եղել մեզ այդ ծրագրերի իրականացման գործում: Ծանոթ եմ կազմակերպության հայաստանյան գրասենյակի առաջիկա տարիների ծրագրերին. այն ուղղությունները, որոնք ընտրվել են, համահունչ են կառավարության այսօրվա գերակայություններին»,-նշել է Ա. Գեւորգյանը:
Նա կարեւորել է կազմակերպության կողմից Հայաստանում բազմաբնակարան շենքերի բարեկարգման, Նիդեռլանդների կառավարության աջակցությամբ իրականացվող սոցիալական բնակարանային ծրագրերը:
Փոխվարչապետը տեղեկացրել է նաեւ, որ ՀՀ կառավարությունն առաջիկայում նախատեսում է ընդունել «Բազմաբնակարան ֆոնդի կառավարման բարելավման 5-ամյա ծրագիրը», որով նոր սկզբունքներ են որդեգրվում, փորձ է արվում գործընկերային հարաբերություններ ձեւավորել մասնավոր սեփականատերերի հետ, եւ հանրության համար ընկալելի դարձնել այն գաղափարը, որ սեփականության առաջին պատասխանատուն հենց սեփականատերն է:
«Հաբիթաթ ֆոր Հյումենիթի»-ի տնօրենների խորհրդի նախագահ Քեն Քլեյն իր հերթին արդյունավետ ու օգտակար փոխգործակցության պատրաստակամություն է հայտնել: Ըստ նրա` այն երկրներում, որտեղ աշխատում են կառավարությունների հետ, իրենց գործունեությունն ավելի մեծ արդյունավետություն է ունենում: «Հաբիթաթ ֆոր Հյումենիթի»-ի գաղափարախոսության հիմքում այն մոտեցումն է, որ յուրաքանչուրն իր բնակարանի պատասխանատուն է, եւ կազմակերպությունը պատրաստ է աջակցել կառավարությանը`այդ գաղափարը բնակչությանը հասանելի դարձնելու համար:
Նշենք, որ «Հաբիթաթ ֆոր Հյումենիթի»-ի ծրագրերն ուղղված են մարդկանց բնակարանային պայմանների բարելավմանը: 2000 թ-ից մինչ այսօր կազմակերպությունը Հայաստանում իրականացրել է մոտ 3,25 միլիոն դոլարի ներդրումային ծրագրեր:
