Հայաստանը չի կարող կանխել հայկական ծագմամբ Ռուսաստանի եւ Ուկրաինայի քաղաքացիների մասնակցությունը Ուկրաինայում ռազմական  գործողություններին։ Այս մասին մարտի 24-ին՝ Ազգային ժողովում արտաքին հարաբերությունների մշտական ​​խորհրդարանական հանձնաժողովի արտահերթ նիստում ասաց հանրապետության արտաքին գործերի նախարար Արարատ Միրզոյանը՝ պատասխանելով պատգամավորների հարցերին։

Նրա խոսքով՝ նշված անձինք, այդ երկրների քաղաքացիներ են։

«Եվ նրանք ունեն համապատասխան իրավունքներ եւ պարտավորություններ», - նկատեց նախարարը։

Միաժամանակ նա նշեց, որ դեռ 2022 թվականի փետրվարին, այսինքն՝ ռազմական գործողությունների մեկնարկից հետո, Հայաստանի արտաքին գործերի նախարարությունը հսկայական աշխատանք է կատարել մարտական գործողությունների գոտուց հանրապետության քաղաքացիների տարհանման եւ հայրենիք վերադարձնելու ուղղությամբ։