Առողջապահական ստանդարտների պահպանումը դպրոցներում կարևոր է. օրինակ, քաշի նորմատիվները եւս դպրոցը պետք է պահի իր ուշադրության կենտրոնում. այդ խնդրին ամեն օր բախվում ենք դպրոցներում: Այս մասին այսօր՝ օգոստոսի 31-ին, կառավարության նիստում հայտարարեց վարչապետ Նիկոլ Փաշինյանը:

«Դա կապ ունի եւ հոգեբանական վիճակի հետ: Օրինակ, մանավանդ 21-րդ դարում անիմաստ ուտելը հոգեբանական խնդիրներ հաղթահարելու միջոց է: Միջազգային հայտնի տերմին կա՝ stress-eating: «Երեխաների ճարպակալումը միջազգային օրակարգերում արձանագրված է որպես շատ լուրջ խնդիր»,-ասաց նա:

ԿԳՄՍ նախարար Ժաննա Անդրեասյանն իր հերթին տեղեկացրեց, որ սեպտեմբերի 1-ից դպրոցներում պարտադիր է դառնում հոգեբանի հաստիքը:

Առողջապահության փոխնախարար Լենա Նանուշյանն արձագանքեց, որ ԿԳՄՍՆ-ի հետ աշխատանք է տարվել, որպեսզի երեխաները ցածր դասարաններից սովորեն առողջ ապրելակերպին և զերծ մնան հիվանդություններից:

«Ցավոք, պետք է նշեմ, որ վերջերս մեր իրականացրած մի հետազոտության արդյունքում 7 տարեկան երեխաների շրջանում հայտնաբերեցինք, որ մեր երեխաների ամեն 4-րդն ավելցուկային քաշ ունի: Իսկ դա նշանակում է, որ ավելի շատ պետք է աշխատենք իրենց կրթության ժամանակ, սովորեցնենք, թե առողջ ափսեն ինչպես պետք է ձևավորվի, ծնողներին սովորեցնենք, զերծ պահենք մեր երեխաներին հեռուստատեսությամբ և այլ միջոցներով վնասակար ուտելիքի գովազդից»,- ասաց նախարարի տեղակալը:

ՀՀ վարչապետ Նիկոլ Փաշինյանն արձագանքեց՝ եթե հետազոտություն արվի, կպարզվի, որ ամեն 4-րդ երեխա չունի խաղահրապարակ, դպրոցում չկա մարզասրահ, մարզասրահում չկա մարզական գույք, և որ ամեն 4-րդ երեխա կյանքում լողավազան չի տեսել:

Փաշինյանը նաև ընդգծեց, որ սեփական փորձով գիտի՝ մարզերում երեխաները ամառը լողալու համար շատ հաճախ ոտքով կամ ամենագնաց մեքենաներով 7-8 կմ վտանգավոր ճանապարհ են կտրում, որպեսզի լողալու հասանելիություն ունենան:

«Ամեն երեխա Հայաստանում պետք է ունենա լողավազանին հասանելիություն, մարզասրահին պետք է ունենա հասանելիություն, խաղահրապարակին պետք է ունենա հասանելիություն»,- ասաց վարչապետը: