Ռուսաստանը դեմարշ է իրականացրել Ադրբեջանի դեմ՝ կապված Ռուսաստանի Դաշնության չորս շրջաններում ընտրությունների մասին Բաքվի հայտարարության հետ։ Այդ մասին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, հաղորդում է «ՌԻԱ նովոստին»:

«Ադրբեջանական կողմին ուղղված դեմարշ է իրականացվել։ Մենք ամեն ինչ ասել ենք դրա հետ կապված»,- ասել է Զախարովան։

«Մենք ելնում ենք նրանից, որ Բաքուն պետք է մեր երկրի տարածքային ամբողջականության հարցին վերաբերվի նույն հարգանքով, ինչ մեզանից ակնկալում են մեր գործընկերները, երբ խոսքը վերաբերում է Ադրբեջանի Հանրապետության տարածքային ամբողջականությանը»,- հավելել է նա։

Հիշեցնենք, որ Ադրբեջանի ԱԳՆ–ն հայտարարել էր, որ վերջին ընտրությունները, որոնք անցկացվել են Ուկրաինայի միջազգայնորեն ճանաչված տարածքների մի մասում (Դոնեցկի, Լուգանսկի, Զապորոժիեի, Խերսոնի մարզերի տարածքներում. խմբ.), չեն համապատասխանում չափանիշներին, դրանք իրավական ուժ չունեն։