նախընտրելի դարձնել
ԱՄՆ նախագահի հանրապետական թեկնածու Դոնալդ Թրամփը հայտարարել է, որ ուրբաթ Ֆլորիդայի Փալմ Բիչ քաղաքում հանդիպելու է Իսրայելի վարչապետ Բենիամին Նեթանյահուի հետ։
Նեթանյահուն Վաշինգտոնում է և չորեքշաբթի պետք է ելույթ ունենա ԱՄՆ Կոնգրեսում, իսկ հինգշաբթի Սպիտակ տանը կհանդիպի նախագահ Ջո Բայդենի հետ։
«Անհամբերությամբ սպասում եմ Բիբի Նեթանյահուին Մար-ա-Լագոյում՝ Ֆլորիդայի Փալմ Բիչում», - գրել է Թրամփը Truth Social-ում:
ԱՄՆ նախկին նախագահը, որը հրապարակային մեկնաբանություններում Իսրայելին կոչ է արել «վերջացնել» պատերազմը Գազայում իսլամիստական ՀԱՄԱՍ խմբավորման դեմ, մշտապես իրեն դիրքավորել է իբրև Իսրայելի հուսալի դաշնակից:
2017-2021 թվականներին Սպիտակ տանը Թրամփի պաշտոնավարման ժամանակ էր, որ ԱՄՆ-ն իր դեսպանատունը Թել Ավիվից տեղափոխեց Երուսաղեմ։ Սա ուրախացրել է իսրայելցիներին և զայրացրել պաղեստինցիներին։
Թրամփը նաև բարձր է գնահատել տարիներին ստորագրված Աբրահամի համաձայնագրի միջնորդության գործում իր դերակատարությունը, երբ կարգավորվել է Բահրեյնի և Արաբական Միացյալ Էմիրությունների հետ Իսրայելի երկկողմ հարաբերությունները։
«Իմ առաջին ժամկետի ընթացքում մենք խաղաղություն և կայունություն ունեինք տարածաշրջանում, նույնիսկ ստորագրելով պատմական Աբրահամի համաձայնագիրը: Եվ մենք դրանք նորից կունենանք»,- գրել է Թրամփը։
Նա նաև քննադատել է 2024 թվականի Դեմոկրատական կուսակցության նախագահի նոր թեկնածուին՝ փոխնախագահ Քամալա Հարիսին՝ հայտարարելով, որ նա ոչ մի կերպ ի վիճակի չէ համաշխարհային հակամարտությունների դեմն առնել։
