Հայաստանի կադաստրի կոմիտեն առաջարկում է քաղաքացիներին չտուգանել նախկինում նույն կառույցի կողմից թույլ տված սխալների համար։ Այս մասին սեպտեմբերի 9-ին Ազգային ժողովի նիստում «Գնահատման գործունեության մասին» օրենքում փոփոխություններ և լրացումներ կատարելու մասին օրինագծի քննարկման ժամանակ հայտարարեց Կադաստրի կոմիտեի նախագահ Սուրեն Թովմասյանը։

Նրա խոսքով, խոսքն այն իրավիճակների մասին է, երբ սխալներ են թույլ տրվել կադաստրային տվյալների թվայնացման ժամանակ։ Սրա պատճառով քաղաքացիներն ավելի քիչ գույքահարկ են վճարել։

«Գործող օրենսդրության համաձայն՝ քաղաքացիները պարտավոր են ոչ միայն փոխհատուցել այս տարիների ընթացքում չվճարված հարկերի չափը, այլև վճարել տույժեր ու տուգանքներ»,- պարզաբանեց Թովմասյանը։

Առաջարկվող նախագծով քաղաքացիները կազատվեն հենց Կադաստրի կողմից թույլ տված սխալների պատճառով կուտակված տույժ-տուգանքների վճարման պարտավորությունից։

Իշխող «Քաղաքացիական պայմանագիր» կուսակցության պատգամավոր Հովիկ Ագազարյանի կարծիքով՝ պատասխանատվությունից պետք է ազատվեն միայն այն քաղաքացիները, ովքեր չարամիտ դիտավորություն չեն իրականացրել։ Այսպիսով, ըստ պատգամավորի, որոշ քաղաքացիներ միանգամայն միտումնավոր խուսափել են պատշաճ գույքահարկ վճարելուց՝ միաժամանակ ունենալով զգալի տարածք։