նախընտրելի դարձնել
ԱՄՆ նորընտիր նախագահ Դոնալդ Թրամփը շաբաթ օրը հայտարարել է, որ ցանկանում է, որ գործարար Չարլզ Քուշները՝ Թրամփի փեսա Ջարեդ Քուշների հայրը, ստանձնի Ֆրանսիայում դեսպանի պաշտոնը։
Թրամփն այս հայտարարությունն արել է Truth Social սոցիալական ցանցում՝ Չարլզ Քուշներին անվանելով «ապշեցուցիչ բիզնես առաջնորդ, բարերար և գործարքների կազմակերպիչ, որը մեր երկիրն ու շահերը ներկայացնող ուժեղ պաշտպան կլինի»:
«Միասին մենք կամրապնդենք Ամերիկայի գործընկերությունը Ֆրանսիայի՝ մեր ամենահին և մեր ամենամեծ դաշնակիցներից մեկի հետ»,- նշել է Թրամփը։
Քուշները «Kushner Companies» անշարժ գույքի ընկերության հիմնադիրն է: Ջարեդ Քուշները՝ Թրամփի նախկին ավագ խորհրդականը, ամուսնացած է Թրամփի ավագ դստեր՝ Իվանկայի հետ։
2020 թվականի դեկտեմբերին Թրամփը ներում էր շնորհել Քուշներ-ավագին, որը դրանից մի քանի տարի առաջ մեղավոր էր ճանաչվել հարկերից խուսափելու և նախընտրական արշավներին անօրինական նվիրատվություններ կատարելու մեջ, գրում է CBS News-ը։
