նախընտրելի դարձնել
Ուրբաթ դաշնային դատավորը երկարաձգել է միլիարդատեր Իլոն Մասկի Կառավարության արդյունավետության բարձրացման դեպարտամենտի (DOGE) մուտքի արգելքը ԱՄՆ ֆինանսների նախարարության վճարային համակարգեր, մինչդեռ մեկ այլ դատավոր թույլատրել է միլիարդատիրոջ ղեկավարած DOGE աշխատակիցներին հասանելիություն ունենալ առողջապահության, աշխատանքի եւ սպառողների ֆինանսական պաշտպանության գործակալությունների գրառումներին, տեղեկացրել է Reuters-ը:
Կառավարության արդյունավետության բարձրացման վարչությունը սկսել է ստուգումները դաշնային գործակալություններում այն բանից հետո, երբ հանրապետական Դոնալդ Թրամփն անցած ամիս դարձավ ԱՄՆ նախագահ եւ Tesla-ի ղեկավարի վրա դրեց ոչ իրատեսական ծախսերն արմատախիլ անելու պարտականությունը Թրամփի կառավարության արմատական բարեփոխումների շրջանակում, որը ներառում է հազարավոր աշխատատեղերի կրճատումներ:
Մանհեթենում ԱՄՆ օկրուգային դատավոր Ժանետ Վարգասը երկարաձգել է շաբաթ օրը մտցված DOGE գործունեության արգելքը, որը թույլ չի տվել Մասկի թիմին ունենալ գանձապետական համակարգերի մուտքի իրավունք, որոնք պատասխանատու են տրիլիոն դոլարների վճարումների համար:
Դատական նիստում դատավորն ասել է, որ դեռ որոշում չի կայացնի 19 նահանգների գլխավոր դատախազների միջնորդության վերաբերյալ՝ երկարաձգելու DOGE դաշնային գործակալությունների՝ համակարգեր մուտք գործելու նախնական արգելքը: Գլխավոր դատախազների գործը առնվազն 20-ից մեկն է, որոնք առնչվում են կառավարության միջամտության չափը կրճատելու ջանքերին:
Իր հերթին, ԱՄՆ օկրուգային դատավոր Ռենդոլֆ Մոսը քննարկել է Կալիֆոռնիայի համալսարանի ուսանողների ասոցիացիայի խնդրանքը՝ երկարաձգել DOGE մուտքի ժամանակավոր արգելքը կրթության դեպարտամենտի համակարգերին, ինչը, ըստ ուսանողների, կխախտի գաղտնիության եւ վարչական ընթացակարգերի մասին օրենքները: Դեմոկրատ նախագահ Բարաք Օբամայի կողմից նշանակված դատավորն ասել է, որ որոշում կկայացնի մինչեւ երկուշաբթի։
Ավելի վաղ ԱՄՆ-ում մոտ 70 հայց է ներկայացվել Թրամփի նախաձեռնությունները վիճարկելու համար՝ սկսած ծննդյան իրավունքով քաղաքացիությունից մինչեւ տրանսգենդերների բժշկական միջամտությունների դաշնային ֆինանսավորման սահմանափակումը, եւ դրանցից շատերն արգելափակվել են դատարանների կողմից:
Ուրբաթ երկու այլ դատական լսումների ժամանակ դատավորները հրաժարվել են անմիջապես որոշում կայացնել DOGE թիմի մուտքն արգելող միջնորդությունների երկարաձգման վերաբերյալ:
