Նախընտրելի
Ուկրաինայում պատերազմի շարունակումը նշանակում է Ռուսաստանի դիրքերի դանդաղ, բայց աստիճանական թուլացում Հարավային Կովկասում, այսօր՝ մայիսի 3-ին, «ՌԴ-ի եւ ԱՄՆ-ի միջեւ երկխոսությունը եւ հնարավոր հետեւանքները Եվրասիական անվտանգության եւ Հարավային Կովկասի համար» միջազգային կլոր սեղանի ժամանակ ասել է Կիրառական հետազոտությունների հայկական ինստիտուտի (APRI Armenia) ավագ գիտաշխատող Բենիամին Պողոսյանը։
«Դա, իհարկե, չի նշանակում, թե Ռուսաստանը դուրս է եկել Հարավային Կովկասից, Ռուսաստանը Հարավային Կովկասում է, մենք Հայաստանում ունենք ռուսական ռազմաբազա, կան սահմանապահներ Հարավային Օսիայում, Աբխազիայում, բայց, այնուամենայնիվ, մենք կամաց-կամաց տեսնում ենք, որ ազդեցությունը թուլանում է»,- նշել է փորձագետը։
Բենիամին Պողոսյանի կարծիքով՝ Ռուսաստանի համար ամենամեծ հարվածը Լեռնային Ղարաբաղում հայերի էթնիկ զտումն էր։
«Այսինքն՝ այն փաստը, որ այժմ Լեռնային Ղարաբաղում հայեր չկան, գումարած այն, որ դրանից հետո չկան ռուսական խաղաղապահ ուժեր, հավանաբար ամենամեծ հարվածն էր Ռուսաստանի համար»,- նշել է նա։
Փորձագետը հիշեցրել է, որ հայ-ադրբեջանական սահմանին այլեւս ռուս սահմանապահներ կամ ռուսական բանակ չկան, իսկ Իրանի հետ սահմանին ռուս սահմանապահներ գրեթե չկան։
«Շատ է խոսվում այն մասին, որ միգուցե մեկ տարի հետո կամ մինչեւ այս տարվա վերջ հայ-իրանական սահմանին ընդհանրապես ռուս սահմանապահներ չլինեն, այսինքն՝ դանդաղ միտում կա, որ Ռուսաստանի դիրքերը կթուլանան»,- ընդգծել է նա։
«Եվ եթե Ուկրաինայում պատերազմը շարունակվի, ապա, այնուամենայնիվ, մեկ տարվա ընթացքում մենք ականատես կլինենք Ռուսաստանի դիրքերի դանդաղ թուլացմանը, եւ, ի վերջո, դա կարող է հանգեցնել մի իրավիճակի, երբ Հարավային Կովկասում մենք կարող ենք ունենալ այնպիսի իրավիճակ, երբ Ռուսաստանը կլինի թիվ երկու արտաքին խաղացողը Հարավային Կովկասում»,- եզրափակել է նա։
Իսկ Ուկրաինայում պատերազմի դադարեցման դեպքում, փորձագետի կարծիքով, Ռուսաստանն ավելի շատ հնարավորություններ կունենա կանգնեցնելու իր դիրքերի թուլացման այս շատ դանդաղ, բայց իրական գործընթացը անգամ Հարավային Կովկասի հանրապետությունների տեսակետից։
