նախընտրելի դարձնել
Դանիան Եվրոպայում ամենաբարձր կենսաթոշակային տարիքն է նշել այն բանից հետո, երբ երկրի խորհրդարանն ընդունել է օրենք, որը մինչեւ 2040թ. այն կբարձրացնի մինչեւ 70 տարեկան, հայտնել է BBC News-ը։
2006-ից Դանիան պաշտոնական կենսաթոշակային տարիքը կապում է կյանքի տեւողության հետ եւ վերանայում է այն յուրաքանչյուր հինգ տարին մեկ։ Այն ներկայում 67 տարեկան է, սակայն 2030թ. կբարձրանա մինչեւ 68 տարեկան, իսկ 2035թ.՝ 69 տարեկան։
70 կենսաթոշակային տարիքը կկիրառվի 1970թ. դեկտեմբերի 31-ից հետո ծնված բոլոր մարդկանց համար։
Նոր օրենքն ընդունվել է հինգշաբթի օրը՝ 81 կողմ, 21 դեմ ձայներով։
Այնուամենայնիվ, անցյալ տարի Դանիայի վարչապետ Մեթե Ֆրեդերիկսենն ասել է, որ սահող սանդղակի սկզբունքը ի վերջո կվերանայվի:
Վերջին շաբաթների ընթացքում Կոպենհագենում բողոքի ակցիաներ են տեղի ունեցել կենսաթոշակային տարիքի բարձրացման դեմ, որոնց աջակցում են արհմիությունները:
Եվրոպայում կենսաթոշակային տարիքը տարբեր է: Վերջին տարիներին շատ կառավարություններ բարձրացրել են կենսաթոշակային տարիքը:
Շվեդիայում մարդիկ կարող են սկսել կենսաթոշակային վճարումներ ստանալ 63 տարեկանից: Իտալիայում կենսաթոշակային ստանդարտ տարիքը 67-ն է, թեեւ, ինչպես Դանիայում է, այն կարող է ճշգրտվել նաեւ կյանքի սպասվող տեւողության հիման վրա եւ կարող է աճել 2026թ.:
Մեծ Բրիտանիայում 1954թ. հոկտեմբերի 6-ից մինչեւ 1960թ. ապրիլի 5-ը ծնված մարդիկ իրենց կենսաթոշակը ստանում են 66 տարեկանից: Բայց այդ ամսաթվից հետո ծնվածների համար պետական կենսաթոշակային տարիքը աստիճանաբար կաճի:
Իսկ Ֆրանսիայում 2023թ. օրենք է ընդունվել, որով կենսաթոշակային տարիքը 62-ից բարձրացվում է 64-ի։ Այս փոփոխությունը բողոքի ցույցեր եւ անկարգություններ է առաջացրել, եւ նախագահ Էմանուել Մակրոնը ստիպված է եղել այն անցկացնել խորհրդարանով առանց քվեարկության:
