նախընտրելի դարձնել
Սիրիայում ԱՄՆ նորանշանակ դեսպան Թոմաս Բարաքը Դամասկոս կատարած իր առաջին այցի ժամանակ հինգշաբթի հայտարարել է՝ հավատում է, որ Սիրիայի և Իսրայելի միջև խաղաղությունը հնարավոր է, հաղորդում է Reuters-ը։
Բարաքը գովաբանել է իսլամիստների գլխավորած կառավարությունը և հայտարարել, որ այն պատրաստ է երկխոսության։
Թոմաս Բարաքը 2012 թվականին ԱՄՆ դեսպանատան փակվելուց ի վեր առաջին անգամ բարձրացրել է ամերիկյան դրոշը դեսպանի նստավայրի վրա՝ ընդգծելով ԱՄՆ-ի և Դամասկոսի կապերի արագ ընդլայնումը նախագահ Դոնալդ Թրամփի՝ պատժամիջոցների անսպասելի վերացումից և Սիրիայի առաջնորդ Ահմեդ աշ-Շարաայի հետ հանդիպումից հետո։ «Սիրիան և Իսրայելը լուծելի խնդիր են։ Սակայն ամեն ինչ սկսվում է երկխոսությունից,- Դամասկոսում լրագրողների փոքր խմբին հայտարարել է Բարաքը։- Ես կասեի, որ մենք պետք է սկսենք չհարձակվելու մասին պարզ համաձայնագրից, խոսենք սահմանների և սահմանային գոտիների մասին»։
Բարաքը միաժամանակ հայտարարել է, որ Միացյալ Նահանգներն այլևս Սիրիային որպես ահաբեկչության հովանավոր պետություն չի համարի՝ շեշտելով, որ խնդիրը «լուծվել է Ասադի ռեժիմի տապալմամբ», բայց Կոնգրեսն այն վերանայելու համար վեցամսյա ժամկետ ունի։
«Ամերիկայի մտադրությունը և նախագահի տեսլականն այն է, որ մենք պետք է այս երիտասարդ կառավարությանը հնարավորություն ընձեռենք՝ առանց միջամտելու, առանց պահանջներ ներկայացնելու, առանց պայմաններ դնելու, առանց մեր մշակույթը ձեր մշակույթին պարտադրելու», -հայտարարել է Բարաքը։
Բարաքը, որը նաև ԱՄՆ դեսպանն է Թուրքիայում, նշանակվել է Սիրիայում ԱՄՆ դեսպան մայիսի 23-ին։ Նա նշել է, որ Սիրիան գտնվում է ԱՄՆ պատժամիջոցների տակ 1979 թվականից ի վեր։ Ամենախիստ միջոցառումներից մի քանիսն ընդունվել են 2020 թվականին՝ այսպես կոչված «Կեսարի օրենքի» շրջանակում, որն, ըստ Բարաքի, Կոնգրեսը 180 օրվա ընթացքում պետք է չեղյալ հայտարարի։
«Խոստանում եմ, որ միակ մարդը, ով ավելի քիչ համբերություն ունի այս պատժամիջոցների նկատմամբ, քան դուք բոլորդ, նախագահ Թրամփն է», -ընդգծել է նա։
Միացյալ Նահանգները Դամասկոսում իր դեսպանատունը փակել է 2012 թվականի փետրվարին՝ գրեթե մեկ տարի անց, երբ Ասադի դեմ ավելի քան մեկ տասնամյակ տևած բողոքի ցույցերը Սիրիայում վերածվեցին զինված հակամարտության։
Այն ժամանակվա դեսպան Ռոբերտ Ֆորդը Սիրիայից հետ կանչվեց դեսպանատան փակվելուց կարճ ժամանակ առաջ։ Հետագայում Սիրիայում ԱՄՆ դեսպանները գործել են արտասահմանից և չեն այցելել Դամասկոս։
