Մոսկվայում 27-ամյա հայաստանցի Հայրիկ Երվանդյանին դատապարտել են 12 տարվա ազատազրկման, գրում է «Коммерсантъ»-ը։

Երվանդյանը մեղադրվում էր մայրաքաղաքի կենտրոնում ուրիշի պատվերով  իր հայրենակից, գործարար Հովհաննես Քամարյանի վրա կրակելու մեջ։ Ինքը՝ Երվանդյանը, խոստովանել է, սակայն՝ պնդել, որ հանցագործության պատվիրատու չի եղել, սեփական հաշիվներն է մաքրել Քամարյանի հետ, քանի որ վերջինս սպառնացել էր իրեն, և ինքը որոշել է առաջ ընկնել։

Օգոստոսի 13-ին Մոսկվայի քաղաքային դատարանը Հայրիկ Երվանդյանի քրեական գործով դատավճիռ է ընդունել։ Այս տարվա ապրիլին սկսված դատավարությունից հետո նախագահող դատավոր Դմիտրի Գորդեևը ամբաստանյալին մեղավոր է ճանաչել վարձու սպանության (ՌԴ Քրեական օրենսգրքի 105-րդ հոդվածի 2-րդ մաս) և հրազենի ապօրինի ձեռքբերման, փոխանցման և պահպանման (ՌԴ Քրեական օրենսգրքի 222-րդ հոդվածի 4-րդ մաս) համար։

Երվանդյանը դատապարտվել է 11 տարվա ազատազրկման՝ սպանության համար և 8 տարվա՝ զենքի ապօրինի շրջանառության համար։ Դատավճիռները մասնակիորեն գումարելով՝ Հայրիկ Երվանդյանը, ի վերջո, դատապարտվել է 12 տարվա ազատազրկման խիստ ռեժիմի գաղութում, դատական նիստում դատախազի պահանջած ժամկետի գրեթե կեսը. նա պնդում էր 23 տարվա ազատազրկում։ Բացի դրանից, ամբաստանյալը պետք է մահացածի հարազատներին 3 միլիոն ռուբլի վճարի՝ իբրև բարոյական վնասի փոխհատուցում։

62-ամյա Հովհաննես Քամարյանը սպանվել է 2022 թվականի հունիսի 2-ին Մոսկվայում՝ Կոմսոմոլսկի պողոտայում՝ «Սեյջի» ռեստորանի մոտակայքում։

Այդ երեկո գործարարը տուն էր վերադառնում իր 22-ամյա ընկերուհու՝ Եկատերինա Պոպովայի հետ, որը Մոսկվա էր եկել Նիժնի Նովգորոդից։ Երբ զույգն անցնում էր այն տան կամարի մոտով, որտեղ ապրում էր Քամարյանը, մի տղամարդ, նրանց ետևից վազելով, խլացուցիչով ատրճանակով մի քանի անգամ կրակել է տղամարդու վրա։

Գործարարը ընկել է, իսկ ընկերուհին՝ գոռացել և փախուստի է դիմել։ Մարդասպանը չի հետապնդել նրան, այլ մոտեցել է Հովհաննես Քամարյանին և կրակել զոհի գլխին։ Այնուհետև նա հանել է բջջային հեռախոսն ու  լուսանկարել ասֆալտին ընկած մահացած տղամարդուն։ Դրանից հետո փախել է դեպքի վայրից։