Օգոստոսի 16-ին, տեղական ժամանակով առավոտյան ժամը 9-ի սահմաններում, Անքորիջի Hotel Captain Cook հյուրանոցի գործարար կենտրոնում հյուրերը հանրային տպիչի մեջ գտել են ԱՄՆ Պետդեպարտամենտի ութ էջանոց փաստաթղթեր՝ նախագահ Թրամփի և Վլադիմիր Պուտինի հանդիպումից ընդամենը երկու ժամ առաջ։ Էջերը պատրաստված են եղել «Արարողակարգի ծառայության» կողմից, որը գլխավորում է Մոնիկա Քրոուլին, հայտնում է NPR-ը։
Փաստաթղթերը պարունակել են գագաթնաժողովի մանրամասները՝ հանդիպումների ստույգ վայրերն ու ժամերը, աշխատակիցների կոնտակտային համարները, ինչպես նաև «ի պատիվ Նորին Գերազանցություն Վլադիմիր Պուտինի» պաշտոնական ճաշի նկարագրությունը։ Նյութերում նշվել է նաև նվերի՝ սպիտակագլուխ արծվի տեսքով սեղանի արձանիկի մասին։
Ներկայացվել են նաև ռուսական անունների արտասանության հնչյունական հուշումներ, այդ թվում՝ Պուտինի համար նախատեսված տարբերակը՝ «Mr. President POO-tihn»։
Փաստաթղթերում մանրամասն ներկայացվել է նաև սեղանի շուրջ նստեցման կարգը. մի կողմից Թրամփին շրջապատել են պետքարտուղար Մարկո Ռուբիոն, պաշտպանության նախարար Փիթ Հեգսեթը և աշխատակազմի ղեկավար Սյուզի Ուայլսը, մյուս կողմից՝ ֆինանսների նախարար Սքոթ Բեսենթը, առևտրի նախարար Հովարդ Լաթնիկը և խաղաղության առաքելությունների հարցերով հատուկ բանագնաց Սթիվ Ուիթքոֆը։ Պուտինի կողքին են նստել արտաքին գործերի նախարար Սերգեյ Լավրովը և արտաքին քաղաքականության հարցերով խորհրդական Յուրի Ուշակովը։
Ճաշացանկում եղել են կանաչ աղցան՝ շամպայնի վինեգրետով, ֆիլե-մինյոն՝ բրենդի-պղպեղի սոուսով, խավարտի համար՝ կարտոֆիլի խյուս և ծնեբեկ, իսկ աղանդերի համար՝ կրեմ-բրյուլե, հայտնում են լրատվամիջոցները։
Այս միջադեպը մեծացրել է Թրամփի վարչակազմում անվտանգության միջոցառումների վերաբերյալ մտահոգությունները, հատկապես նախորդ՝ «Signalgate» սկանդալի ֆոնին։
Լոս Անջելեսի Կալիֆոռնիայի համալսարանի ազգային անվտանգության հարցերով պրոֆեսոր Ջոն Մայքլսը կարծիք է հայտնել, որ տեղի ունեցածը վարչակազմի «անփութության և անիրազեկության հետագա ապացույցն է». «Դուք, պարզապես, չպետք է թղթեր թողնեք տպիչների մեջ։ Ամեն ինչ այնքան պարզ է»։
նախընտրելի դարձնել
