Reuters գործակալությունը, վկայակոչելով անանուն աղբյուրների, համառոտ ներկայացրել է Ռուսաստանի նախագահ Վլադիմիր Պուտինի առաջարկները, որոնք նա հնչեցրել է Ալյասկայում ԱՄՆ նախագահ Դոնալդ Թրամփի հետ հանդիպման ժամանակ։

Ինչպես նշում են լրատվամիջոցները, երկու աղբյուրներ, որոնք ցանկացել են անանուն մնալ՝ զգայուն հարցեր քննարկելիս, ասել են, որ Պուտինի առաջարկների վերաբերյալ իրենց տեղեկությունները հիմնականում հիմնված են Եվրոպայի, ԱՄՆ-ի և Ուկրաինայի ղեկավարների միջև քննարկումների վրա, և նշել են, որ դրանք ամբողջական չեն։ 

Ըստ աղբյուրների, Պուտինի առաջարկը բացառել է հրադադարը մինչև համապարփակ համաձայնագրի կնքումը՝ արգելափակելով Ուկրաինայի նախագահ Վլադիմիր Զելենսկու առանցքային պահանջը։ 

«Ռուսաստանի առաջարկած գործարքի համաձայն, Կիևը պետք է ամբողջությամբ դուրս բերի զորքերը Դոնեցկի և Լուգանսկի մարզերի արևելյան շրջաններից՝ ի պատասխան Ռուսաստանի խոստման՝ սառեցնել ճակատային գծերը հարավային մարզերում, ինչպիսիք են Խերսոնի և Զապորոժիեի մարզերը», - հայտնել են աղբյուրները։ Ուկրաինան արդեն մերժել է ցանկացած նահանջ ուկրաինական հողերից, ինչպիսին է Դոնեցկի մարզը, որտեղ խրամատավորվել են նրա զորքերը, և որը, ըստ Կիևի, ծառայում է որպես կարևորագույն պաշտպանական կառույց՝ ռուսական հարձակումները երկրի խորքը կանխելու համար։ Աղբյուրների համաձայն, Ռուսաստանը պատրաստ կլիներ վերադարձնել ուկրաինական հողերի համեմատաբար փոքր հատվածները, որոնք նա օկուպացրել է Սումիի հյուսիսային և Խարկովի հյուսիս-արևելյան շրջաններում։ 

Ըստ ուկրաինական Deep State battlefield mapping project-ի, Ռուսաստանը տիրապետում է Սումիի և Խարկովի մարզերի շուրջ 440 քառակուսի կիլոմետր ընդհանուր մակերեսով տարածքների։ Ուկրաինան վերահսկում է Դոնբասի շուրջ 6600 քառակուսի կիլոմետրը, որն իր մեջ ներառում է Դոնեցկի և Լուգանսկի մարզերը, և որոնց նկատմամբ հավակնում է Ռուսաստանը։

Թեև ամերիկացիները դա չեն հստակեցրել, աղբյուրները հայտնել են, որ իրենց հայտնի է, որ ռուսաստանյան առաջնորդը նաև ձգտել է, առնվազն, Ղրիմի նկատմամբ Ռուսաստանի ինքնիշխանության պաշտոնական ճանաչմանը, որը Մոսկվան գրավել է Ուկրաինայից 2014 թվականին։ Առայժմ հայտնի չէ՝ արդյոք դա նշանակում է ճանաչում ԱՄՆ կառավարության, թե, օրինակ, բոլոր արևմտյան տերությունների և Ուկրաինայի կողմից։ Կիևը և նրա եվրոպացի դաշնակիցները մերժում են թերակղզու վրա Մոսկվայի իշխանության պաշտոնական ճանաչումը։

Նրանք ասել են, որ Պուտինը նաև ակնկալում է Ռուսաստանի դեմ կիրառված բազմաթիվ պատժամիջոցներից առնվազն մի քանիսի չեղարկումը։ Սակայն նրանք չեն կարողացել ասել՝ դա վերաբերում է ԱՄՆ-ի, թե եվրոպական պատժամիջոցներին։ 

Ուկրաինային նաև կարգելվի անդամակցել ՆԱՏՕ-ի ռազմական դաշինքին, թեև Պուտինը, ըստ ամենայնի, պատրաստ է եղել, որ Ուկրաինան ինչ-որ անվտանգության երաշխիքներ ստանա, հայտնել են աղբյուրները։ 

Ըստ աղբյուրների, Ռուսաստանը նաև կպահանջի ռուսաց լեզվին պաշտոնական կարգավիճակ տրամադրել Ուկրաինայի որոշ մասերում կամ ամբողջ տարածքում, ինչպես նաև Ռուս ուղղափառ եկեղեցու ազատ գործունեության իրավունք։