Իրանի և Ռուսաստանի նախագահները ողջունել են երկու երկրների միջև աճող բարեկամական հարաբերությունները՝ կարևորելով Իրան-Ռուսաստան Համապարփակ ռազմավարական գործընկերության պայմանագրի իրականացումը՝ որպես երկկողմ համագործակցության ընդլայնման կատալիզատոր։ Երկուշաբթի օրը Չինաստանի Տյանցզին քաղաքում Շանհայի համագործակցության կազմակերպության (ՇՀԿ) 25-րդ գագաթնաժողովի շրջանակում կայացած հանդիպման ժամանակ Իրանի նախագահ Մասուդ Պեզեշկիանը և նրա ռուս գործընկեր Վլադիմիր Պուտինը ընդգծել են երկկողմ պայմանագրի իրականացման դերը հարաբերությունների զարգացման գործում, հաղորդում է Tasnim-ը։

Փեզեշքիանն ասել է, որ Ռուսաստանի հետ շարունակական փոխգործակցությունը շատ արժեքավոր է Իրանի համար։

Նա հայտարարել է, որ երկարաժամկետ պայմանագրի կնքումը ճանապարհ կհարթի համագործակցության ընդլայնման համար և ընդգծել է, որ Եվրասիական տնտեսական միության (ԵԱՏՄ) շրջանակում համագործակցությունը էլ ավելի կարագացնի և կհեշտացնի երկու երկրների միջև էական փոխգործակցությունը։ Փեզեշքիանը նշել է իր անձնական հանձնառությունը՝ Ռուսաստանի հետ բոլոր համաձայնագրերի իրականացումը արագացնելու  և ցանկացած հնարավոր խոչընդոտ վերացնելու համար։

Նա կարևորել է փորձի փոխանակումը և գիտական ու ակադեմիական համագործակցության զարգացումը, ինչը թույլ կտա միավորել երկու երկրների հնարավորությունները և ամուր հիմք կստեղծի բազմակողմ փոխգործակցության համար։ Անդրադառնալով աշխարհաքաղաքական իրավիճակին՝ Իրանի նախագահը քննադատել է Միացյալ Նահանգների և նրա դաշնակիցների միակողմանի մոտեցումը ամրապնդելու ջանքերը։

Նա մատնանշել է ՇՀԿ գագաթնաժողովի քննարկումները՝ ընդգծելով, որ նման միջազգային կազմակերպությունները համապատասխան հարթակ են տրամադրում բազմակողմանիության սկզբունքը խթանելու համար, հաղորդում է նախագահի աշխատակազմի կայքը։

Ի պատասխան՝ Պուտինը իր լավագույն մաղթանքներն է փոխանցել Իրանի գերագույն առաջնորդ այաթոլլա Սեյեդ Ալի Խամենեիին և ընդգծել, որ երկու երկրների միջև հարաբերությունները գնալով ավելի բարեկամական են դառնում և ընդլայնվում, հատկապես համապարփակ երկարաժամկետ պայմանագրի ստորագրումից ու իրականացումից հետո։

Նա նշել է վերջին ամիսներին Իրանի և Ռուսաստանի միջև առևտրի ծավալի զգալի աճը՝ հայտարարելով, որ Իրանի և ԵԱՏՄ-ի միջև ազատ առևտրի մասին համաձայնագրի շարունակական գործողությունը վճռորոշ դեր կխաղա համագործակցության հետագա ընդլայնման գործում։

Պուտինը նաև ընդգծել է Իրանի և Ռուսաստանի ժողովուրդների միջև կապերի ամրապնդման կարևորությունը՝ նշելով Ռուսաստանում սովորել ցանկացող իրանցի ուսանողների թվի նկատելի աճը: Նա մասնավորապես նշել է երկու երկրների համատեղ կազմակերպվող տարբեր մշակութային փառատոներն ու ծրագրերը, ինչպես նաև զբոսաշրջային փոխանակումների աճը:

Ռուսաստանի նախագահը նշել է երկու երկրների միջև տարբեր տարածաշրջանային և միջազգային հարցերի շուրջ կանոնավոր և շարունակական շփումները, ներառյալ Իրանի խաղաղ ատոմային գործունեության ոլորտում նրանց համագործակցությունը։