Շվեյցարիայի նախագահ Գի Պարմելենը կիրակի օրը Corriere della Sera իտալական թերթին տված հարցազրույցում հայտարարել է, որ Հռոմի վրդովմունքը՝ կապված Նոր տարվա գիշերը մահվան ելքով հրդեհի վայրի՝ բարի սեփականատիրոջը գրավով ազատ արձակելու հետ, լիովին հասկանալի է, սակայն հավելել է, որ հաշտարար դատավորները գործում են անկախ։

Իտալիայի վարչապետի գրասենյակը շաբաթ օրը հայտարարել էր, որ բարի սեփականատեր Ժակ Մորետտիի ազատ արձակման որոշումը դարձել է «լուրջ վիրավորանք և ևս մեկ վերք, հասցված Կրան-Մոնտանայի ողբերգության զոհերի ընտանիքներին և նրանց, ովքեր դեռ գտնվում են հիվանդանոցում»։

Կիրակի օրը Corriere della Sera-ին տված հարցազրույցում Իտալիայի վարչապետ Ջորջիա Մելոնին կոչ է արել Շվեյցարիային լսել Իտալիայի առաջարկը՝ ստեղծել համատեղ քննչական խումբ։ Իտալիան հայտարարել է, որ հանձնարարել է իր դեսպանին Շվեյցարիայում հայտնել իր «խորը վրդովմունքը» Վալե կանտոնի գլխավոր դատախազին և մեկնել Հռոմ՝ հետագա քայլերը քննարկելու համար։

Պարմելենը կիրակնօրյա թերթին տված հարցազրույցում նշել է, որ Շվեյցարիան պաշտոնապես տեղեկացված չի եղել դեսպանին հետ կանչելու որոշման մասին։

«Սա սովորական դիվանագիտական քայլ է… խորհրդակցություններից հետո դեսպանը կվերադառնա Շվեյցարիա։ Քաղաքական գործիչները չպետք է միջամտեն դատական համակարգին։ Մենք, անշուշտ, կարող ենք հասկանալ վրդովմունքը», — ասել է Շվեյցարիայի նախագահը։

Հունվարի 1-ի վաղ առավոտյան Շվեյցարիայի Կրան-Մոնտանա լեռնադահուկային հանգստավայրում, դեռահասներով լեփ-լեցուն բարում բռնկված հրդեհը խլել է 40 մարդու կյանք, այդ թվում՝ Իտալիայի վեց քաղաքացու, վնասվածքներ է ստացել ավելի քան 100 մարդ։ Ողբերգություը մեծ արձագանք է գտել իտալական մամուլում և հասարակական կարծիքում։